Logo

Sub-banner

निसीखोलामा एकैसाथ सात झोलुङ्गे पुल



निसीखोला गाउँपालिकामा अहिले धमाधम झोलुङ्गे पुल निर्माण भइरहेका छन् । गत वर्ष गाउँपालिकाको विभिन्न वडामा सात वटा झोलुङ्गे पुल निर्माण भएका थिए भने यस वर्ष पनि थप सात वटा नयाँ झोलुङ्गे पुल निर्माण हुँदैछन् ।

पुल निर्माणले स्थानीयमा खुसीसमेत छाएको छ । गाउँपालिकाले जीर्ण बनेका पुल विस्थापित गर्ने र आवश्यक स्थानमा धमाधम नयाँ झोलुङ्गे पुल निर्माण गर्ने अभियानलाई तीव्र बनाएको छ ।

गत वर्ष गाउँपालिका–६ को सेबाङघाट, सरिटारघाट, चुसाङघाट र वडा नम्बर ७ को कुतखोलाघाट, वडा नम्बर ३ र ४ जोड्ने ढुवाँखोरघाट पुल, वडा नम्बर १ को माराघाट, वडा नम्बर २ धौलेघाट झोलुङ्गे पुल निर्माण सम्पन्न भएर सञ्चालनमा आएको गाउँपालिकाका सूचना अधिकारी पुरुषोत्तम गौतमले जानकारी दिनुभयो ।

उहाँका अनुसार यस वर्ष निसीखोला गाउँपालिका–४ र ५ जोड्ने कारीखोलामा, वडा नम्बर ६ को मगराखोलामा वडा नम्बर ५ यारीखोलामा, वडा नम्बर ३ र ४ जोड्ने गतेराखोलामा वडा नम्बर २ र ३ जोड्ने खग्रेनीघाटमा, वडा नम्बर एकको आठबारेघाटमा र वडा नम्बर ७ को खनिबासमा नयाँ पुल निर्माण भइरहेका छन् ।

पुल निर्माणपछि दैनिकी सहज बन्ने निसीखोला गाउँपालिका–५ का मानसिंह बुढाले बताउनुभयो । उहाँले पुल जीर्ण भएपछि जोखिम मोलेर खोला वारपार गर्नुपर्ने बाध्यता रहेको भन्दै अब यसको अन्त्य हुने उहाँको विश्वास छ ।

“अहिले यो खोला सानो छ, वारपार गर्न सकिन्छ तर वर्षातको समयमा खोला बढेर पानी माथि–माथि आएको हुन्छ, खोला तर्नै सकिँदैन,” बुढाले भन्नुभयो “यहाँ समस्या भएपछि हामीले गाउँपालिका अध्यक्षलाई अनुरोध गरेका थियौँ, यसपाली योजना परेर काम हुँदैछ, यो बर्खा त खोला वारपार गर्न सजिलो हुन्छ होला ।”

उहाँले पुल नबन्दा खोला वारपार गर्दा धेरै बालबालिका, महिला र ज्येष्ठ नागरिकले धेरै सास्ती र सकस पाउने गरेको बताउनुभयो । निसीखोला–७ का प्रतापजंग थापाले खोला वारपार गर्ने झोलुङ्गे पुल जीर्ण बनेपछि जोखिम मोलेर यात्रा गर्नु परेको भन्दै अब यो समस्याको समाधान हुने उहाँको भनाइ छ । पुल निर्माणपछि गाउँका सबै नागरिकलाई वारपारमा सहजता थपिने थापाले बताउनुभयो ।

सात वटा पुल निर्माणका लागि झण्डै दुई करोड बजेट लाग्ने सूचना अधिकारी गौतमको भनाइ छ । केन्द्रीय सरकारको ८७ प्रतिशत र गाउँपालिकाको १३ प्रतिशत बजेट साझेदारीमा पुल निर्माण हुन थालेको गौतमले बताउनुभयो ।

गाउँपालिकाका अध्यक्ष तारानाथ पौडेलले जनताको माग र आवश्यकताको आधारमा पुल निर्माण भइरहेको बताउनुभयो । अध्यक्ष पौडेलले पालिकाभित्रका कुनै पनि नागरिकलाई खोला वारपारमा समस्या नहोस भन्ने हेतुले केन्द्रीय सरकारसँगको समन्वयमा पुल निर्माण गरि रहेको बताउनुभयो ।

प्रकाशित : ६ बैशाख २०७९, मंगलबार

सूचना विभाग दर्ता नं.

१२०७/2075/76

सम्पर्क

Chabahil -7 Kathmandu Nepal
+9779841869701
[email protected] [email protected]

हाम्रो समूह

  • प्रधान सम्पादक
    बिपेन्द्र कार्की
  • प्रमुख कार्यकारी अधिकृत
    कुमार खतिवडा
  • सम्पादक
    सरोज कुमार कार्की
  • संवाददाता
    पार्वती थपलिया
  • प्रकाश भण्डारी
    पुनम साह