काठमाडौं । व्यापार तथा निकासी प्रवर्द्धन केन्द्रको कार्यकारी निर्देशकमा सरदविक्रम राणा नियुक्त भएका छन् ।
सोमबार बसेको मन्त्रिपरिषद बैठकले राणालाई टीईपीसीको कार्यकारी निर्देशकमा नियुक्त गर्ने निर्णय गरेको सञ्चार तथा सूचना प्रविधि मन्त्रालयको जिम्मेवारी सम्हालेका गृहमन्त्री वालकृष्ण खाँडले मंगलबार आयोजित पत्रकार सम्मेलनमा जानकारी दिए ।
राणा यसअघि पनि टीईपीसीमा कार्यकारी निर्देशक थिए । तर, केही महिनापहिले कार्यकाल पूरा गरे पनि केन्द्रमा नयाँ नियुक्ति हुन सकेको थिएन ।
राणासहित ईश्वरीप्रसाद घिमिरे र रमेश कडरिया कार्यकारी निर्देशकका लागि अन्तिम तीनमा छनोट भए पनि मन्त्रिपरिषदले राणालाई नियुक्त गरेको हो ।
उद्योग बाणिज्य क्षेत्रमा झण्डै तीन दशक बिताएका राणाले हालैमात्र अन्तर्राष्ट्रिय व्यापारको इतिहासदेखि वर्तमानसम्मका चुनौती र अवसर समेटेर लेखेको ‘नेपालको अन्तर्राष्ट्रिय व्यापारः चुनौती र अवसर’ पुस्तक सार्वजनिक भएको छ ।
वैदेशिक व्यापारमा सुक्ष्म अध्येता तथा प्राविधिक पक्षको समेत ज्ञाता मानिएका राणाा निजी क्षेत्रसँग समन्वय गर्नसक्ने कुशल प्रशासक र व्यवस्थापक मानिन्छन् ।
प्रतिक्रिया