काठमाडौं । सुनचाँदी क्षेत्रका तीनवटै संगठनबीच सहकार्य हुने भएको छ । नेपाल रत्न तथा आभुषण संघ, नेपाल सुनचाँदी व्यवसायी महासंघ र नेपाल सुनचाँदी रत्न तथा आभुषण महासंघबीच सहकार्य हुने भएको हो ।
संघको पहलमा तीनवटै संगठनबीच सहकार्यको सहमति भएको र यससँगै बहुमूल्य गहनाको कारोबारमा एकरुपमा ल्याउने सहमति भएको संघका अध्यक्ष ज्योत्सना श्रेष्ठले जानकारी दिइन् ।
तीनवटै संगठनको बैठकले तीनबुँदे निर्णयसमेत गरेको छ । जसमा बहुमूल्य गरगहनाको कारोबारमा एक रुपता ल्याउन दुवै महासंघ र संघ बिच कार्यगत एकता गरी कार्यन्वयन गर्ने सहमति भएको छ ।
यस्तै, सुनचाँदी हिरा तथा बहुमूल्य रत्नको आयातमा देखिएका कमी कमजोरीलाई अध्ययन गरी समाधानको लागि पहल गर्ने सहमति भएको जनाइएको छ ।
बैठकले सरकारले जारी गरेको विद्युतिय माध्यमबाट बिलबिजक जारी गर्ने सम्बन्धमा दुवै महासंघ र संघले अध्ययन गरी सम्बन्धित निकायमा समस्या समाधानको लागि पहल गर्ने निर्णय गरेको छ ।
सरकारले आगामी आर्थिक वर्षदेखि १० करोडभन्दा बढी कारोबार गर्ने फर्म वा कम्पनीले अनिवार्य रुपमा विद्युतीय बिजक जारी गर्नुपर्ने नियम ल्याएसँगै यो समस्या समाधानका लागि पहल गर्ने जनाइएको छ ।
प्रतिक्रिया