काठमाडौं । सुदूरपश्चिम प्रदेशमा कृषि क्षेत्रलाई सुदृढ बनाउने महत्वपूर्ण कदमको रुपमा धनगढीमा कृषि क्षेत्रका लघु, साना तथा मझौला उद्यमीहरू संगको परामर्श कार्यक्रम सम्पन्न भएको छ ।
नेपाल उद्योग वाणिज्य महासंघ अन्तर्गतको कृषि उद्यम केन्द्रको आयोजनामा केन्द्रका अध्यक्ष डिबि बस्नेतको अध्यक्षतामा संचालित कार्यक्रममा प्रदेशका भूमि व्यवस्था, कृषि तथा सहकारी मन्त्री वीरबहादुर थापाको प्रमुख आतिथ्यता रहेको थियो ।
कार्यकमलाई सम्बोधन गर्दै मन्त्री थापाले कृषि क्षेत्रका प्रमुख सरोकारवालाहरूलाई एकै ठाउँमा ल्याएर यस किसिमको महत्वपूर्ण परामर्शको आयोजना गरेकोमा कृषि उद्यम केन्द्रको प्रशंसा गर्दै स्थानीय स्तरमा उत्पादित कृषि उत्पादनहरूको प्रवर्धन गर्न उत्पादक कृषकका साथै लघु, साना तथा मझौला उद्यमीहरू समेतलाई सहयोग गरी सुदुरपश्चिम प्रदेशको कृषि क्षेत्रलाई रूपान्तरण गर्ने प्रतिबद्धता व्यक्त गरे ।
प्रदेशभित्र कृषि व्यवसायमा संलग्न व्यवसायीहरूको वर्तमान अवस्था मूल्याङ्कन गर्ने, उनीहरुका लागि सहयोगी नीतिहरुको लेखाजोखा गर्ने, कृषि उद्यम केन्द्रद्वारा संचालित लघु, साना तथा मझौला उद्यमी सहयोग कार्यक्रममा संलग्न उद्यमीहरूबाट सफलताका कथाहरू साझा गर्ने र आवश्यक नीति तर्जुमाको सिफारिस गर्ने कार्यक्रमको मुख्य उद्देश्य रहेको छ ।
यस्तै, कार्यक्रमका निष्कर्षहरूले स्थानीय, प्रादेशिक र संघीय स्तरका नीति निर्माताहरूलाई सुझाव पेश गर्ने छ ।
कार्यक्रममा कृषि उद्यम केन्द्र बोर्ड सदस्य सुनिता न्हेमाफुकीले प्यानल छलफल सन्चालन गरेकी थिइन । जसमा प्रदेश नीति तथा योजना आयोगका सदस्य माननीय प्राध्यापक डा. जगतबहादुर सिंह रावल, प्रदेश कृषि निर्देशनालयबाट खगेन्द्र शर्मा; सुदुरपश्चिम महासंघ उपाध्यक्ष अनिल कुमार, प्रदेश सहकारी संघका माधव शर्मा र असल सिर्जना कृषि सहकारी, लम्कीका कृष्णा घर्ती प्यानालिष्टको रूपमा थिए । उक्त प्यानलले उद्यमीहरुको वर्तमान अवस्था, सम्भावना एवं चुनैतीका बारेमा छलफल गरेको थियो ।
सो अवसरमा कृषि उद्यम केन्द्रका अध्यक्ष बस्नेतले कृषिमा आवद्द व्यवसायीहरूको अधिकार सुनिश्चित गर्न र नेपालभर कृषि व्यवसायीकरणलाई प्रवर्द्धन गर्न केन्द्रको निरन्तर प्रयास रहेको जानकारी दिए । बस्नेतले स्थानीय उत्पादक र व्यापारीहरूलाई बजारको अवस्था अनुकूल नभएसम्म आफ्नो सामान भण्डारण गर्न सातै प्रदेशका उत्पादन स्तरमा ठूला गोदामहरूको आवश्यकता रहेको बारे प्रकाश पार्दै गोदाम निर्माण र संचालनमा सरकारको ध्यानाकर्षण गराए । उनले स्थानीय व्वसायी मिलेर बनेको कम्पनीमार्फत कृषि व्यवसायीकरणको नमुना प्रारम्भ गर्न महासंघलाई कम्तिमा ५० हेक्टर जग्गा एकै ठाउँमा उपलब्ध गराउन प्रदेश सरकारसमक्ष आग्रह समेत गरे ।
समिटबाट डा. नारायण खनाल र सिचन श्रेष्ठ, सफल पार्टनर्सका आशुतोष तिवारी र कृषि उद्यम केन्द्रका डिल्ली पौडेलले व्यवसाय प्रवर्धनका विविध विषयमा प्रस्तुती गरेका थिए । साथै कैलाली उद्योग वाणिज्य संघका उपाध्यक्ष दिनेश लम्सालले भारतको मकैको व्यवसायिक क्षेत्रको भ्रमणबाट आएका आफ्ना अनुभवहरू सुनाएका थिए । कार्यक्रम कृषि उद्यम केन्द्रका का.मु. प्रमुख कार्यकारी अधिकृत दिपेन्द्र जोशीले संचालन गरेका थिए ।
प्रतिक्रिया