काठमाडौं। निर्माण व्यवसायीको छाता संस्था नेपाल निर्माण व्यवसायी महासंघ (एफ्क्यान) अध्यक्षमा युवा व्यवसायी निकोलस पाण्डे निर्वाचित भएका छन् ।
बिहीबार राजधानीमा भएको महासंघको १३औं महाधिवेशन अन्तर्गत निर्वाचनले पाण्डेको नेतृत्वमा नयाँ कार्यसमिति निर्वाचित गरेको हो।
अध्यक्षमा निर्वाचित पाण्डे कालिका कन्सट्रक्सनका निर्देशक हुन् ।
निर्वाचन समितिबाट सार्वजनिक परिणामअनुसार नवनिर्वाचित अध्यक्ष पाण्डेले ५१४ मत ल्याएर विजयी हुँदा निकटतम प्रत्यासी वरिष्ठ उपाध्यक्ष आङ दोर्जी लामाले ४१३ मत पाए ।
यस्तै, वरिष्ठ उपाध्यक्षमा रामजी पन्त ४७४ मत ल्याएर विजयी बनेका छन्। पन्त पाण्डे समूहबाटै उम्मेदवार बनेका थिए।महासचिवमा शिवहरि घिमिरे ५२७ मत ल्याएर विजयी भए। उनका प्रतिस्पर्धी बलिभद्र रानाले ३८० मत पाए ।
पाण्डे समूहबाट वरिष्ठ उपाध्यक्षमा मुकेश पन्त, महासचिवमा धीरेन्द्र दाहाल र कोषाध्यक्षमा उज्ज्वल गौतमले उम्मेदवारी दिएका थिए ।
वरिष्ठ उपाध्यक्षमा रोशन दाहाल र रामजी पन्त (मुकेश) प्रतिस्पर्धामा थिए।
उपाध्यक्षतर्फ एसोसिएटमा नरहरि थपलिया र एनपी शेर्पा चुनावी मैदानमा उत्रिएका थिए। महासचिवमा बलिभद्र राना र शिवहरि घिमिरेको उम्मेदवारी मनोनयन दर्ता भएको थियो ।
उपमहासचिवमा इन्जिनियर सन्तोष साह, चन्द्रशेखर मल्ल र सुवित श्रेष्ठबीच प्रतिस्पर्धा भएको थियो। कोषाध्यक्ष पदका लागि बालाजु श्रेष्ठ र उज्ज्वल गौतम प्रतिस्पर्धामा थिए। सह–कोषाध्यक्ष पदमा उपेन्द्रकुमार घिसिङ र दिनेशबहादुर सिंह चुनावी मैदानमा उत्रिएका थिए।
पाण्डेले निर्माण व्यवसाय क्षेत्रमा देखिएका समस्याका लागि सरकारसँग बहस गर्ने र सार्वजनिक खरिद ऐनका दफा खारेजका लागि पहल गर्ने प्रतिबद्धता जनाएका छन्।
प्रतिक्रिया