काठमाडौं । हिन्दुहरुको सबैभन्दा ठूलो आस्थाको केन्द्र पशुपतिनाथ मन्दिरमा सर्वसाधारणले चढाउने भेटीभन्दा विशेष पूजाबाट बढी रकम संकलन हुने गरेको पाइएको छ ।
गत आर्थिक वर्षमा जम्मा ५ करोड ७९ लाख रुपैयाँमात्रै भेटी संकलन भएको छ भने विशेष पूजाबाट ७ करोड ७८ लाख संकलन भएको छ ।
नेपाल र भारतका लाखौं हिन्दुले दर्शन गर्ने पशुपतिनाथ मन्दिरमा भेटी चढाउने गर्दछन् । पशुपति क्षेत्र विकास कोषले संस्कृति पर्यटन तथा नागरिक उड्डयन मन्त्रालयमा पेश गरेको विवरण अनुसार आव २०७४/७५ मा ५ करोड ७९ लाख रुपैयाँ भेटी संकलन भएको उल्लेख छ ।
आधा दशक अघिसम्म पशुपतिको सम्पूर्ण भेटीमा पूजारी भारतीय भट्टहरुको नियन्त्रण हुने गरे पनि पछिल्ला वर्षमा कोषले नै यसको लगत राख्दै आएको छ भने भट्टहरुलाई तलबी बनाइएको छ ।
कोषले बुझाएको विवरणअनुसार सरकारले गत वर्ष पशुपति क्षेत्र विकास समितिलाई २२ करोड ९० लाख बजेट पठाएको थियो भने कार्यालयतर्फ शीर्षकमा ३१ करोड ६७ लाख आम्दानी भएको उल्लेख छ ।
यसरी कोषले गत वर्ष ६८ करोड १४ लाख २१ हजार आम्दानी गरेको देखिन्छ ।
खर्च ४५ करोड ७७ लाख
कोषले गत वर्ष खर्च ४५ करोड ७७ लाख रुपैयाँ बराबरको खर्च गरेको छ । जसमा सरकारको पुँजीगत अनुदानबापत प्राप्त १३ करोड १८ लाख रुपैयाँ रहेको छ भने आन्तरिक पुन्ज्गित खर्च ७८ लाखमात्रै छ ।
यस्तै, कोषले आन्तरिक प्रशासनिक शीर्षकमा २२ करोड ८१ लाख खर्च गरेको देखिन्छ भने विशेष पूजामा कोषले ३ करोड ५२ लाख र नित्य पूजामा ३७ लाख खर्च गरेको छ ।
कोषले भट्ट, भण्डारी, रकमी कर्मचारीको तलब भत्तामा पनि ५ करोड ११ लाख रुपैयाँ खर्च गरेको छ ।
प्रतिक्रिया