नेपालको स्वास्थ्य क्षेत्र सुधारका लागि विश्व बैंकद्वारा झण्डै १३ अर्ब ऋण स्वीकृत

विश्व बैंकले नेपालका लागि १० करोड अमेरिकी डलर (१२ अर्ब ९१ करोड ६३ लाख नेपाली रूपैयाँ) ऋण स्वीकृत गरेको छ । विश्व बैंकको कार्यकारी सञ्चालक समितिले आज नेपाल गुणस्तर स्वास्थ्य प्रणाली कार्यक्रम सञ्चालनका लागि १० करोड अमेरिकी डलर ऋण स्वीकृत गरेको हो ।

‘स्वास्थ्यलाई प्राथमिकता दिएर लगानी गरेमा नेपालले सुधारिएको स्वास्थ्य परिणाम, उत्पादकत्व वृद्धि र आर्थिक वृद्धि लगायतका धेरै फाइदा लिन सक्छ,’ माल्दिभ्स, नेपाल र श्रीलंकाका लागि विश्व बैंकका देशीय निर्देशक फारिस हदाद-जेर्भोसले भने, ‘विश्व बैंकले स्वास्थ्य प्रणाली नीति,योजना र सेवा प्रवाहको मुख्य आधारमा गुणस्तर राख्ने नेपालको लक्ष्यलाई समर्थन गर्दछ।’

नेपालको स्वास्थ्य क्षेत्र रणनीतिक योजना, २०२२ को रणनीतिक उद्देश्यहरू हासिल गर्न सघाउन संघीय स्तरमा स्वास्थ्य बीमा बोर्ड, कोशी र गण्डकी प्रदेशका प्रदेश र स्थानीय सरकारको समन्वयमा स्वास्थ्य तथा जनसङ्ख्या मन्त्रालयले कार्यक्रम सञ्चालन गर्नेछ । जसमा स्वास्थ्य प्रणालीको दक्षता र उत्तरदायित्व अभिवृद्धि, स्वास्थ्यमा दिगो वित्तपोषण, सामाजिक सुरक्षा प्रवर्द्धन र गुणस्तरीय स्वास्थ्य सेवामा समान पहुँच प्रवर्द्धन समावेश हुनेछ ।