नेपाल एलपी ग्यास उद्योग संघले नेपाल आयल निगमका नवनियुक्त कार्यकारी निर्देशकलाई नयाँ कार्यकालको सफलताको शुभकामना दिएको छ । एलपी ग्यास उद्योग संघका अध्यक्ष शिव प्रसाद घिमिरेको नेतृत्वमा गएको संघको पदाधिकारी टोलीले नवनियुक्त कार्यकारी निर्देशक डा. चण्डिका प्रसाद भट्टलाई कार्यकाल सफलताको शुभकामना दिएको हो ।
निगमको मूख्यालय टेकुमा भएको भेटघाट कार्यक्रममा संघका अध्यक्ष शिव प्रसाद घिमिरे एलपीजी क्षेत्रमा देखिएका समस्या र चुनौतीका विषयमा कार्यकारी निर्देशकको ध्यानाकर्षण गराए । सो भेटघाट एवं शुभकामना आदाप्रदान कार्यक्रममा बोल्दै अध्यक्ष घिमिरेले आफूहरु निगमसँग मिलेर अघि बढ्न सदैव तयार रहेको बताए । उनले निगम र ग्यास उद्योगीबीच कम्तीमा महिनाको एक पटक ग्यास उद्योगीहरुले भोग्दै आएको समस्या र चुनौतीका विषयलाई समेटेर छलफल राख्नुपर्नेमा जोड दिए ।
घिमिरेले पछिल्लो समय सम्पूर्ण ग्यास उद्योगहरु अटोमेशनमा गएको र अन्तर्राष्ट्रिय गुणस्तर मापदण्डलाई समेत फलो गरेको जनाए ।
त्यस्तै, उनले ग्यास ढुवानीका सन्दर्भमा देखिएका समस्या र टीडीएस जस्ता विषयलाई हल गर्न निगमको भूमीका महत्वपूर्ण रहेको बताए । ग्यासको उपयोगमा देखिएको जनचेतनाको कमीका कारण हुने गरेका घटना र त्यसले पुर्याउने क्षतीका विषयमा समेत जनचेतना मूलक सामाग्रीलाई उपभोक्ता माझ पुर्याउनु पर्नेमा घिमिरेले जोड दिए ।
सो भेटका क्रममा संघका पूर्व अध्यक्ष गोकुल भण्डारीले आयल निगमलाई नयाँ ढंगबाट सुधार गर्दे लैजानुपर्ने बताए ।
“हामी सुरक्षाको मामिलामा धेरै सजक छौ । र, आज सम्पूर्ण उद्योगलाई अटोमेसनमा लैजान सफल भएका छौ । एनओसी अहिले पनि पूरानै ढैगबाट चलीराखेको छ । यसमा सुधार हुन आवश्यक छ”, भण्डारीले भने ।
सो कार्यक्रममा एलपी ग्यास उद्योग संघका संस्थापक अध्यक्ष हरि प्रसाद पाठकले नेपाल आयाल निगम समय सापेक्ष रुपमा परिवर्तन हुनु पर्ने र उद्यमीका समस्या र चुनौतीलाई समयमै बिना झन्झट हल गर्नुपर्नेमा जोड दिए ।
कार्यक्रममा नेपाल आयल निगमका कार्यकारी निर्देशक डा. चण्डिका प्रसाद भट्टले ग्यास उद्यमी र निगमबीचको सम्बन्ध अझ प्रगाढ रहने बताए । उनले निगमलाई परम्परागत ढंगबाट भन्दा पनि स्वचालित तरिकाबाट अगाडी बढाउन आफू तयार रहेको बताए ।
भट्टले आगामी दिनमा निगम ग्यास इन्धनमा मात्र केन्द्रित नभई विटुमिन, लुब्रिकेन्ट, हाइड्रोजन जस्ता अन्य वस्तुहरुमा समेत केन्द्रित रहने जनाए ।
प्रतिक्रिया