काठमाडौं । ज्वरो नाप्ने मेसिन अर्थात थर्मल गन कालोबजारी गरेको आरोपमा प्रहरीले पक्राउ गरेका व्यवसायी सुलभ अग्रवाल निजी क्षेत्रको संगठन नेपाल उद्योग परिसंघ (सीएनआई)का उपाध्यक्षसमेत हुन् ।
परिसंघ राष्ट्रिय काउन्सिलमा अग्रवालसहित आधा दर्जन उपाध्यक्ष र एक वरिष्ठ उपाध्यक्ष छन् । उनी परिसंघको स्थायी समिति सदस्य पनि हुन् ।
जगदम्बा स्टिल्सका सञ्चालक अग्रवाल सीएनआईका गतिविधिमा पनि उत्तिकै सक्रिय थिए । सीएनआईले देशव्यापी सञ्चालन गरिरहेको राहत वितरणका क्रममा उनले सोमबारसम्म राहत वितरणमा सहभागी भइरहेको तस्बिर सीएनआईले उपलब्ध गराएको थियो ।
तर, शंकर समूहका निर्देशकसमेत रहेका अग्रवाललाई प्रहरी आफैंले ग्राहक बनेर जाँदा प्रतिगोटा १५ हजार रुपैयाँमा बिक्री गरेको आरोपमा पक्राउ गरेको छ ।
संकटका बेला सरकार र निजी क्षेत्र मिलेर अघि बढ्नुपर्ने माग भइरहेका बेला निजी क्षेत्रको ठूलो घरानाका व्यवसायी यसरी पक्राउ परेपछि नैतिकताको संकट उत्पन्न भएको छ ।
सरकारका हरेक निर्णयलाई आँखा चिम्लेर स्वागत गर्दै आएको परिसंघका उपाध्यक्ष नै पक्राउ परेपछि उसलाई पनि टिप्पणी गर्न संकट देखिन्छ ।
प्रतिक्रिया