काठमाडौं । डा. गोविन्द केसीको अनसनलाई सफल बनाउन सडकबाट निर्णायक भूमिका निर्वाह गरेको प्रमुख प्रतिपक्षी नेपाली कांग्रेस तत्काल सडकबाट ब्याक नहुने भएको छ ।
कांग्रेसले संविधानविपरित प्रतिनिधिसभा, राष्ट्रियसभा र प्रदेशसभाहरुमा सभामुख र उपसभामुख एउटै पार्टीको भएको भन्दै यसलाई सच्याउन दबाब दिन सडक आन्दोलन जारी राख्ने भएको हो ।
कांग्रेसका सभापति शेरबहादुर देउवाले शुक्रबार भरतपुमा पनि सभामुख र उपसभामुख एउटै पार्टीको भएसम्म काँग्रेसको आन्दोलन जारी रहने स्पष्ट पारेका छन् । संविधानको अक्षरसः पालनाका लागि सभामुख र उपसभामुखमध्ये एउटा छोड्नैपर्ने आफूहरुको माग रहेको देउवाको भनाइ छ ।
देउवाले प्रा. डा. गोबिन्द केसीसँग भएको सहमति स्वागतयोग्य भएको भन्दै उहाँले कार्यान्वयन गर्न सरकारलाई सुझाव दिए ।
डेमोक्रेटिक लयर्स एसोसिएसनको शनिबार गैंडाकोटमा शुरु हुने राष्ट्रिय महाधिवेशनको उदघाटन गर्न पुगेका देउवाले तीनपाङ्ग्रे सवारी चालकले गरेको शान्तिपूर्ण आन्दोलनमा गोली चलाइएको भन्दै विरोध जनाए ।
यस्तै, कांग्रेसका वरिष्ठ नेता रामचन्द्र पौडेलले देशमा महँगी बढेको, जथाभावी कर लगाइएको, भ्रष्टाचार बढेको, सरकार स्वेच्छाचारी ढंगले अघि बढेको भन्दै आन्दोलनको विकल्प नभएकोबताए ।
प्रतिक्रिया