मुक्तिनाथ कृषि कम्पनीले आईपीओ जारी गर्दै

काठमाडौं ।

मुक्तिनाथ कृषि कम्पनीले सर्वसाधारणमा आईपीओ जारी गर्ने प्रक्रिया शुरु गरेको छ ।

सर्वसाधारणको लागि छुट्याइएको धितोपत्र (आईपीओ) निष्कासनको लागि बिहीवार उक्त कम्पनीका कार्यकारी अध्यक्ष भरतराज ढकाल र मेगा क्यापिटल मार्केट्स लिमिटेडका प्रमुख कार्यकारी अधिकृत सवीर बादे श्रेष्ठले एक समारोहका बीच धितोपत्र निष्कासन व्यवस्थापनको लागि सम्झौतापत्रमा हस्ताक्षर गरेका छन् ।

कार्यक्रमा उक्त कम्पनीका सञ्चालक तुलसिराम ढकाल, सिताराम काफ्ले र विजय गुरुङ, प्रमुख कार्यकारी अधिकृत सलिलकुमार श्रीवास्तव, कम्पनी सचिव रामशरण तिमल्सिना, मुक्तिनाथ क्यापिटलका प्रमुख कार्यकारी अधिकृत कविन्द्र ध्वज जोशि, मुक्तिनाथ बैंकका क्षेत्रीय प्रमुख बाबुराम ढकाल र मेगा क्यापिटलका प्रमुख लगानी अधिकृत सुलभ श्रेष्ठ लगायतको उपस्थिति रहेको थियो ।

कृषि क्षेत्रमा काम गर्ने अभिप्रायले निजी क्षेत्रको लगानीमा स्थापना भएका कम्पनीहरु मध्ये सर्वसाधारणको लागि यो धितोपत्र निष्कासन पहिलो हुनेछ । यो शुरुवातसँगैै संस्थागत रुपमा विकास हुन नसकेको कृषि क्षेत्रलाई थप परिस्कृत र लगानीको केन्द्र बनाई संस्थागत विकास र अन्य नयाँ सार्वजनिक कम्पनीको आगमनको लागि कोशेढुङगा सावित हुने मुक्तिनाथ कृषि कम्पनीका कार्यकारी अध्यक्ष भरतराज ढकालले बताए ।

उल्लेखित सम्झौताअनुसार चालू वर्षको चैत मसान्तभित्र निष्कासनको सवै प्रक्रिया पुरा गरी जारी गर्ने लक्ष्य रहेको छ । यसअन्तर्गत सर्वसाधारणको लागि ४ करोड रुपैयाँ बराबरको ४ लाख कित्ता शेयर निष्कासन हुनेछ ।

मुक्तिनाथ बिकास बैंक लिमिटेडलगायत नेपालका ८६३ जनाभन्दा बढि व्यवसायिक व्यक्तिहरुको लगानीमा स्थापना भएको मुक्तिनाथ कृषि कम्पनी लिमिटेडले कृषि पेशालाई प्रतिष्पर्धि र मर्यादित बनाई युवाहरुको आकर्षणको केन्द्र बनाउने लक्ष्यसहित कृषि अर्थतन्त्रमा टेवा पुर्‍याउन कृषि मूल्य श्रृङखलाको अवयवहरुमा काम गर्दै आइरहेको छ ।

२०७५ सालमा १ अर्ब रुपैयाँ अधिकृत पूँजी र ४० करोड रुपैयाँ जारी पूँजीसहित स्थापना भएको कम्पनीमा १० प्रतिशत शेयर सर्वसाधारणको लागि छुट्याइएको छ ।