Logo

Banner-news

नेपाल र स्लोभेनियाबीच आर्थिक सम्बन्ध विस्तारमा काम गरौं : राजदूत घोस



काठमाडौं।

भारत र नेपालका लागि स्लोभेनियाकी राजदूत मोताया बोदेब घोसले दुई देशबीचको आर्थिक सम्बन्ध विस्तारमा जोड दिनुभएको छ । नेपाल उद्योग परिसंघको पदाधिकारीसँगको भेटमा राजदूत घोसले नेपाल र स्लोभेनियाबीचको व्यापार वृद्धि गर्न सकिने क्षेत्रको पहिचान गरी आर्थिक सम्बन्ध विस्तार गर्नुपर्नेमा जोड दिनुभएको हो ।

उहाँले स्लोभेनियाले दीगो पर्यटनमा उदाहरणीय काम गरेको भन्नुहुँदै नेपालले पनि यसमा काम गर्न सक्ने उल्लेख गर्नुभयो । राजदूत घोसले नेपालमा विदेशी लगानीका संभावना रहेका क्षेत्रमा स्लोभेनियाका लगानीकर्ता आकर्षित गर्न आफूले पहल गर्ने बताउनुभयो । ‘नेपाल र स्लोभेनियाबीच दुईपक्षीय आर्थिक सम्बन्ध विस्तारका धेरै संभावना रहेका छन्,’ उहाँले भन्नुभयो, ‘अब हामीले दुईपक्षीय व्यापार विस्तार एवं लगानी वृद्धिका लागि काम गर्नुपर्छ ।’

छलफलका क्रममा परिसंघका अध्यक्ष विष्णुकुमार अग्रवालले नेपालमा कृषि, पर्यटन, जलविद्युतलगायतका क्षेत्रमा लगानीको ठूलो संभावना रहेको भन्दै स्लोभेनियाका लगानीकर्ताले लगानी गर्न सक्ने उल्लेख गर्नुभयो । ‘नेपाल सरकारले नीतिगत सुधारका धेरै काम गरेको छ,’ उहाँले भन्नुभयो, ‘विदेशी लगानीकर्ताका लागि नेपाल आकर्षक गन्तव्य हो ।’ अध्यक्ष अग्रवालले नेपालमा हरित ऊर्जाको अथाह संभावना रहेको र नेपालमा उत्पादित ऊर्जा निर्यातको बजार पनि प्रसस्त रहेकाले विदेशी लगानीकर्ताले ढुक्कले लगानी गर्न सक्ने बताउनुभयो ।

परिसंघका पूर्वअध्यक्ष एवं स्लोभेनियाका अवैतनिक महावाणिज्यदूत हरिभक्त शर्माले स्लोभेनियाले प्रविधिको क्षेत्रमा ठूलो विकास गरेकाले नेपालले पनि औद्योगिक क्षेत्रका लागि आवश्यक प्रविधि भित्र्याउन सक्ने उल्लेख गर्नुभयो ।

परिसंघको कार्यालयमा भएको भेटमा परिसंघका उपाध्यक्षहरु कृष्णप्रसाद अधिकारी र वीरेन्द्रराज पाण्डे तथा बैंकिङ समितिका सभापति अनलराज भट्टराई, एजुकेसन काउन्सिलका सभापति द्विराज शर्मा, राष्ट्रिय परिषदका सदस्य सुरजभक्त पौडेल र महानिर्देशक यादवप्रसाद पौड्यालको उपस्थिति थियो ।

प्रकाशित : २४ मंसिर २०७८, शुक्रबार

सूचना विभाग दर्ता नं.

१२०७/2075/76

सम्पर्क

Chabahil -7 Kathmandu Nepal
+9779841869701
[email protected] [email protected]

हाम्रो समूह

  • प्रधान सम्पादक
    बिपेन्द्र कार्की
  • प्रमुख कार्यकारी अधिकृत
    कुमार खतिवडा
  • सम्पादक
    सरोज कुमार कार्की
  • संवाददाता
    पार्वती थपलिया
  • प्रकाश भण्डारी
    पुनम साह