श्रीलंकाले अस्थायी रूपमा विदेशी ऋण भुक्तानी रोक्का गरेको छ ।
औषधि र खाद्यान्न जस्ता अत्यावश्यक वस्तुहरूको आयातको लागि भुक्तान गर्न आवश्यक परेको विदेशी सञ्चिति घट्दै गएपछि श्रीलंकाले यस्तो कदम चालेको हो । ईन्धन जस्ता अत्यावश्यक वस्तुहरू आयात गर्न आफ्नो घट्दो विदेशी मुद्रा भण्डार प्रयोग हुने भएकाले बाह्य ऋण तिर्न चुनौतीपूर्ण र असम्भव भएको श्रीलंकाको केन्द्रीय बैंकले जनाएको छ ।
मंगलबार पत्रकारहरुसँग कुरा गर्दै गभर्नर पी नन्दलाल वीरासिङ्घेले भने, ‘अर्थतन्त्र यस्तो बिन्दुमा आएको छ कि ऋण भुक्तानी गर्न चुनौतीपूर्ण र असम्भव छ। सबैभन्दा राम्रो कदम भनेको ऋणको पुनर्संरचना गर्नु र कडा डिफल्टबाट बच्नु हो ।’
वीरासिङ्घेले ऋणदातासँगको सम्झौता र अन्तर्राष्ट्रिय मुद्रा कोष (आईएमएफ) सँगको ऋण कार्यक्रमको सहयोगमा देशले सम्झौता नगरेसम्म भुक्तानी रोक्का गर्ने बताए । श्रीलंकाले सोमबार आपतकालीन ऋणका लागि विश्वव्यापी ऋणदातासँग औपचारिक वार्ता सुरु गरेको छ ।
श्रीलंकाको वैदेशिक ऋण ५१ अर्ब डलर छ र यो वर्ष करिब ७ अर्ब डलर तिर्न बाँकी छ ।
प्रतिक्रिया