रामेछाप । रोशी खोलामा आएको बाढीका कारण अवरुद्ध बिपी राजमार्गमा आज बिहानदेखि यातायात सञ्चालन भएको छ ।
शुक्रबार साँझको वर्षाका कारण आएको बाढीले बगाएको डाइभर्सन मर्मत पछि सडकमा दुईतर्फी यातायात सञ्चालनमा आएको जिल्ला प्रहरी कार्यालय काभ्रेले जनाएको छ । प्रहरीले मौसम प्रतिकूलतालाई ध्यान दिँदै यात्रा गर्न अनुरोध गरेको छ ।
बाढीले रोशी क्षेत्रमा अस्थायी सडक बगाएपछि दुई दिनदेखि राजमार्ग अवरुद्ध थियो। खोलामा पानीको सतह शनिबार राति अबेरसम्म सडक मर्मत गरिएपछि यातायात सञ्चालनमा आएको हो ।
जिल्ला प्रहरी कार्यालय काभ्रेका अनुसार काभ्रेको बिपी राजमार्ग सडक खण्ड अन्तर्गत रोशी गाउँपालिका-७ घुमाउने डाँडा,रोशी गाउँपालिका-९ विरुवाडाँडा रोशी गाउँपालिका-११ कालढुङ्गा र नमोबुद्ध नगरपालिका-६ चौकी डाँडामा अविरल वर्षाको कारण झन्डै ४ किलोमिटर सडक पूर्णरुपमा अवरुद्ध रहेको थियो ।
बाढीका कारण काठमाडौंबाट बिपी राजमार्ग हुँदै पूर्वतर्फ आउने–जाने सवारी साधन पूर्ण रूपमा रोकिएका थिए । गत वर्ष आएको बाढीले राजमार्गमा ठुलो क्षति पु¥याएपछि हाल सडक पुनर्निर्माणको काम भइरहेको छ । सोही क्रममा रोशी खोलामा विभिन्न स्थानमा अस्थायी डाइभर्सन बनाएर यातायात सञ्चालन गरिएको छ । बाढीले ती डाइभर्सन बगाएपछि सडक अवरुद्ध भएको हो ।
यसैबिच, बाढीले बगाएको रामेछाप निर्वाचन क्षेत्र ‘ख’को मुख्य प्रवेशद्वार मानिने नेपाल थोक–खैरेनी घाट पुल जोड्ने रोशी खोलाको अस्थायी डाइभर्सन पनि बनाइएको छ । उक्त मार्गमा क्षति पुगेपछि सो सडक पनि अवरुद्ध भएको थियो ।
प्रतिक्रिया