पर्वतमा एक वर्षमा तीन सय उद्योग थपिए

पर्वतमा चालु आर्थिक वर्षमा २८९ नयाँ उद्योग दर्ता भएका छन् । घरेलु तथा साना उद्योग कार्यालयले दिएको जानकारीअनुसार चालु आव ०७८/७९ को जेठ मसान्तसम्म २८९ उत्पादन तथा प्रशोधनमूलक उद्योग र २३८ वाणिज्य प्रकृतिका व्यवसाय दर्ता भएका हुन् ।

कार्यालयले दर्ता तथा नवीकरण दस्तुरबापत लिएको रकमबाट एक वर्षमा नै रु २२ लाख ९० हजार राजश्वसमेत सङ्कलन गरेको छ । कार्यालय प्रमुख मुना अधिकारीका अनुसार चालु आर्थिक वर्षमा नेपालमा नै कम मात्रामा सञ्चालन भएका केराबाट धागो उत्पादन गर्ने गरी कुश्मा नगरपालिका–१ मा धागो उत्पादन उद्योग दर्ता भएको छ भने आयतलाई विस्थापन गर्ने गरी पानी उद्योग लगायतका विभिन्न उत्पादनमूलक उद्योग पनि दर्ता भएका छन् ।

यस वर्ष पर्यटनमूलक उद्योगहरु पनि दर्ता भई सञ्चालनमा आएको अधिकारीले बताउनुभयो । पछिल्लो समय प्रदेश सरकारले कोभिडका कारणले विदेशबाट फर्केका युवालाई उद्योग दर्तामा पूर्ण छुट दिएकाले गत आर्थिक वर्षमा जिल्लामा उद्योगीको सङ्ख्या बढेको कार्यालय प्रमुख अधिकारीले बताउनुभयो । प्रदेश सरकारबाट प्राइभेट फार्म ऐन २०७६ र साझेदारी ऐन २०७६ ले महिला, दलित, अपाङ्गता भएका नागरिकलाई उद्योगमा ५० प्रतिशत रकम छुट दिएकाले उद्योगी बर्सेनि बढ्दै गएका हुन् ।

‘नागरिक आयआर्जनमूलक क्षेत्रमा आफैँ सचेत भएका कारणले पनि उद्योग क्षेत्रमा लगानी गर्न थालेका छन्,” उहाँले भन्नुभयो, “आयतलाई नै विस्थापन गर्ने गरी जिल्लामा उद्योग दर्ता हुने क्रम बढ्दै खुशीको कुरा हो ।” उहाँले उत्पादन तथा पर्यटनमूलक उद्योग सञ्चालनका कारण जिल्लाको आर्थिक समृद्धिमा समेत सहयोग पुग्ने जिकिर गर्नुभयो ।