आयल निगमलाई १५ दिनमा ३९ करोड नाफा, इन्धनको मूल्य भने समायोजन नहुने

भारतको इन्डियन आयल कर्पोरेशन लिमिटेडले पेट्रोलियम पदार्थको नयाँ मूल्य सूची पठाएको छ ।

नयाँ मूल्य सूची अनुसार नेपाल आयल निगमलाई डिजेलमा प्रति लिटर ६ रुपैयाँ ३४ पैसा र एलपी ग्यासमा ३२५ रुपैयाँ ४४ पैसा घाटा रहेको छ । त्यस्तै, पेट्रोल, मट्टीतेल र हवाई इन्धनमा भने निगमलाई नाफा हुने भएको छ ।

निगमका अनुसार आगामी १५ दिनमा ३९ करोड नाफा हुने देखिएको छ । तर, निगमले यस पटक पनि इन्धनको मूल्य भने समायोजन नगर्ने भएको छ । अन्तर्राष्ट्रिय बजारमा इन्धनको मूल्य फेरि बढ्न थालेको र इन्डियन आयल कर्पोरेशनलाई तिर्नुपर्ने रकम धेरै रहेकाले हाललाई मूल्य समायोजन नगरिने निगमले जनाएको छ ।

‘निगमको यस विषम परिस्थिति र बाध्यात्मक अवस्थालाई दृष्टिगत गरी हाललाई पेट्रोलियम पदार्थको साविकको खुद्रा बिक्री मूल्य यथावत् राखिएको छ,’ विज्ञप्तिमा उल्लेख छ ।

निगमले हाल पेट्रोल प्रति लिटर १८१, डिजेल र मट्टीतेल प्रति लिटर १७८ रुपैयाँ, एलपी ग्यास प्रति सिलिन्डर एक हजार ८००, हवाई इन्धन आन्तरिकतर्फ प्रति लिटर १८० रुपैयाँ र बाह्यतर्फ १.६४५  डलरका दरले बिक्री गरिरहेको छ।