काठमाडौं । नेपालमा साढे २९ खर्ब चुक्ता पुँजीका ३ लाख कम्पनी दर्ता भए पनि त्यसको एक तिहाईभन्दा कमले मात्र नियमित नवीकरण गर्ने गरेको पाइएको छ ।
कम्पनी रजिष्ट्रारको कार्यालयका अनुसार यसरी नियमित नवीकरण गर्ने कम्पनीहरुको संख्या भने भने ३१ प्रतिशत मात्र रहेको छ ।
कार्यालयका अनुसार असोज ९ गतेसम्म दर्ता भएका २ लाख ९४ हजार ६२० कम्पनीको चुक्ता पुँजी भने २९ खर्ब ६२ अर्ब १० करोड १५ लाख ७८ हजार ६८० रुपैयाँ ७७ पैसा रहेको छ ।
नियमित नवीकरण गर्ने कम्पनीको संख्या अघिल्लो आर्थिक वर्षसम्म ९१ हजार ७४७ रहेको छ भने गत आवमा कर छुटका कारण २५ हजार ८६० कम्पनीले नवीकरण गराएका छन् ।
यसरी कूल दर्ता भएका कम्पनीको तुलनामा गत आवसम्ममा ३९.९१ प्रतिशतले नवीकरण गराएको कार्यालयको रेकर्डमा उल्लेख छ भने नियमित नवीकरण गराउने कम्पनीको संख्या ३१.१४ प्रतिशत रहेको छ ।
कूल कम्पनीमध्ये प्राइभेट कम्पनी (प्रालि)को संख्या सबैभन्दा बढी २ लाख ८८ हजार ५७ तथा पब्लिक कम्पनीको संख्या १ हजार ८२१ रहेको छ ।
कम्पनी रजिष्ट्रारको कार्यालयमा नाफा कमाउने र नाफारहित गरी दुई प्रकारका कम्पनी दर्ता हुने गर्दछन् । जसमध्ये हालसम्म मुनाफा कमाउने कम्पनीको दर्ता संख्या २ लाख ९० हजार ३१५ र नाफारहित कम्पनीको संख्या ४ हजार ३०५ रहेको छ ।
यस्तै, कार्यालयमा दर्ता भएका वैदेशिक लगानीका कम्पनीहरुको संख्या भने १ हजार १७९ रहेको छ ।
कम्पनी स्थापनाको क्रमसँगै सेयरधनीहरुको संख्या पनि उल्लेख्य रहेको पाइएको छ । उपरजिष्ट्रार कार्कीका अनुसार प्राइभेट कम्पनीका सेयरहोल्डर नागरिककको संखय ७ लाख ४६ हजार ५२८ रहेको छ । यस्तै, दर्ता भएका कम्पनीमध्ये एकल स्वामित्वका कम्पनीको संख्या सबैभन्दा बढी १ लाख २७ हजार ३४३ रहेको छ ।
यता, सरकारले नियमित विवरण बुझाउने प्राइभेट फर्म तथा कम्पनीलाई नवीकरण शुल्कमा फेरि छुट दिने भएको छ । कम्पनी रजिष्ट्रारको कार्यालयका अनुसार आगामी पुस मसान्तभित्र विवरण बुझाउने कम्पनीहरुले यस्तो छुट सुविधा पाउने छन् ।
प्रतिक्रिया