काठमाडौं । मंसिर ४ गते भएको आम निर्वाचन २०७९ अन्तर्गत समानुपातिक मत संख्यामा नेपाल कम्युनिष्ट पार्टी माओवादी केन्द्रले राष्ट्रिय स्वतन्त्र पार्टीभन्दा बढी मत ल्याएको छ ।
समानुपातिकतर्फको मत गणनामा सुरुवातदेखि नै तेस्रो स्थानमा रहेको राष्ट्रिय स्वतन्त्र पार्टीलाई शनिबारको मत परिणामसँगै माओवादी केन्द्रले उछिनेको हो ।
निर्वाचन आयोगका अनुसार स्वतन्त्र पार्टीले हालसम्म ७ लाख ९८ हजार ८११ मत ल्याएको छ भने माओवादी केन्द्रले ८ लाख २१ हजार ७४७ मत ल्याएको छ । यसरी स्वतन्त्र पार्टीभन्दा माओवादी झन्डै २३ हजार मतले अगाडि छ ।
निर्वाचको यो परिणाम हेर्दा माओवादी केन्द्र तेस्रो पार्टी बन्ने पक्कापक्की देखिएको छ भने स्वतन्त्र पार्टीले चौथो स्थानमै चित्त बुझाउनु पर्नेछ ।
समानुपातिकतर्फ नेकपा एमाले पहिलो पार्टी बनेको छ । एमालेले हालसम्म १९ लाख २६ हजार ६२ मत पाएको छ भने दोस्रो स्थानमा रहेको नेपाली कांग्रेसले १८ लाख ५८ हजार २ सय १० मत पाएको छ ।
पाँचौं स्थानमा रहेको राष्ट्रिय प्रजातन्त्र पार्टीले ४ लाख १३ हजार ११६ तथा छैटौं स्थानमा रहेको जनता समाजवादी पार्टीले २ लाख ३३ हजार ३२८ मत पाएको छ ।
प्रत्यक्षतर्फ चौथो पार्टी बनेको नेकपा एकीकृत समाजवादी भने समानुपातिकमा ३ प्रतिशतको थ्रेसहोल्ड पार गर्न संघर्षरत रहेको छ । यो पार्टीले हालसम्म १ लाख ७८ हजार ६६० मत पाएको छ ।
प्रतिक्रिया