मोबाइल वितरक संघले मोबाइल डिभाइस म्यानेजमेण्ट सिस्टम (एमडीएमएस) तत्काल लागू गर्न आग्रह गरेको छ ।
बुधबार एक कार्यक्रम आयोजना गर्दै संघले अवैध रुपमा भित्रिएका मोबाइल कारोबारले वार्षिक अरबौको राजश्व गुमेको जनाउँदै एमडीएमएस सिस्टम तत्काल लागू गर्न माग गरेको हो ।
हाल बजारमा बिक्रि वितरण भइरहेका ४० प्रतिशत मोबाइल विदेशबाट अवैध रुपमा भित्रिएको संघले जनाएको छ । संघले १४ अर्ब बराबरको अवैध मोबाइल फोन भित्रिएको जनाउँदै सरकारले वार्षिक दुई अर्ब बराबरको राजश्व गुमाइरहेको दावी समेत गरेको छ ।
यसरी चोरी पैठारीबाट बजारमा भित्र्याइएको फोनले गर्दा उपभोक्ता समेत मारमा परेको संघले जनाएको छ । संघका अनुसार अवैध रुपमा भित्रिएका फोनहरु डुप्लिकेट, वारेन्टी नभएको तथा बिग्रिएपछि पाटपूर्जा समेत नपाउने समस्याले उपभोक्ता समस्यामा परेका छन् । यस्तै, अवैध रुपमा भित्रिएका चोरीका फोनले उपभोक्ता कानुनी झमेलामा पर्नुका साथै अपराधमा समेत प्रयोग हुन सक्ने भएकाले प्रहरी कारवाहीमा समेत थप चुनौती थपिने संघले जनाएको छ ।
यसअघि, नेपाल दुरसञ्चार प्राधिकरणले एमडीएमएस लागू गर्ने निर्णय गरेपनि सो निर्णयको चौतर्फी विरोध हुँदा प्रधानमन्त्री पुष्पकमल दाहाल प्रचण्डले तत्काललाई सो प्रणाली लागू नगर्न निर्देशन दिएका थिए।
प्रतिक्रिया