बनेपाको आगन्तुक रिसोर्टमा आन्तरीक पर्यटकको चहल पहल बढेको छ । ‘भिजिट नेपाल २०२०’ लाई लक्षित गरेर सन् २०१९ मा सञ्चालनमा आएको यस रिसोर्ट पछिल्लो समय आन्तरीक पर्यटकको पहिलो रोजाइमा पर्न थालेको छ ।
७५ रोपनी क्षेत्रफलमा फैलिएको सो रिसोर्टमा ५२ वटा कोठा रहेका छन् जसमा ४४ वटा डिलक्स रुम, ४ वटा स्वीट रुम र ४ वटा मिनी स्वीट रुम रहेका छन् । यो रिसोर्ट पर्यटन व्यवसायी तथा बैंकर कृष्णप्रसाद ज्ञवाली र हरि नेपालले सञ्चालनमा ल्याएका हुन् ।
सञ्चालक ज्ञवालीका अनुसार रिसोर्टमा हाल स्वीमिङ पुल, फिटनेस सेन्टर, रेष्टुरेन्ट, बार लगाएत विभिन्न सेवाहरु उपलब्ध छन् । यस्तै, आउँदो दिनमा आफ्ना सेवाहरुलाई विस्तार गर्दै क्यासिनो समेत सञ्चालनमा ल्याउने तयारी भइरहेको ज्ञवालीले जानकारी दिए । उनका अनुसार रिसोर्ट मुगलाई थिममा निर्माण गरिएको छ । 
करिब २ अर्ब लागतमा सञ्चालन गरिएको यस रिसोर्टमा ७० जना भन्दा बढीले रोजगारिको अवसर पाएका छन् । सहरी क्षेत्र भन्दा दुई किलोमिटर पर निर्माण गरिएको यस रिसोर्टबाट सगरमाथा लगाएत विभिन्न हिमालको दृश्यावलोकन गर्न सकिन्छ । यहाँ ईटालियन, चाइनिज, कन्टिनेन्टल, थाई लगाएत विभिन्न मुलुकका फरक फरक परिकारको स्वाद लिन सकिन्छ ।
रेसिडेन्ट म्यानेजर विमल पौडेलका अनुसार रिसोर्टमा कोठासहित ब्रेकफास्ट प्याकेजको मूल्य ८ हजार रुपैयाँदेखि २० हजार रुपैयाँ तोकिएको छ भने डिनरसहितको प्याकेज १० देखि ३० हजार रुपैयाँसम्म पर्न आउँछ । यस्तै, रिसोर्टले आन्तरीक र बाह्य पर्पटकहरुका लागि विभिन्न प्रकारका प्याकेजहरु समेत ल्याउने तयारी गरिरहेको पौडेलले जानकारी दिए ।
प्रतिक्रिया