आर्थिक स्थायित्वका लागि चेम्बर र परिसंघले सहकार्य गर्ने

आर्थिक स्थायित्वका लागि नेपाल चेम्बर अफ कमर्स र नेपाल उद्योग परिसंघबीच सहकार्य हुने भएको छ । बजेट र मौद्रिक नीतिको प्रभावकारी समन्वय मार्फत आर्थिक स्थायित्व र विकासका लागि निजी क्षेत्रका दुई प्रतिनिधीमुलक संस्थाबीच सहकार्य हुन लागेको हो । उद्योग परिसंघका नवनिर्वाचित पदाधिकारी एवं कार्यसमितिलाई बधाई एवं शुभकामना दिने क्रममा दुवै संस्थाका नेतृत्वले सहकार्य गरेर अघि बढ्ने समझदारी गरेका छन ।

परिसंघका पदाधिकारीलाई बधाई दि“दै चेम्बरका अध्यक्ष राजेन्द्र मल्लले आगामी वर्षको बजेट र मौद्रिक नीतिको प्रभावकारी समव्यन मार्फत आर्थिक स्थायित्व दिनका लागि निजी क्षेत्रका संस्थाहरुले सहकार्य गर्नुपर्नेमा जोड दिनुभयो । अध्यक्ष मल्लले भन्नुभयो, ‘मुलुकको अर्थतन्त्रलाई उकास्न एवं निजी क्षेत्रको मागलाई सम्वोधन गर्न पनि हामीले सहकार्य गर्न जरुरी छ,।’

उच्च ब्याजदरका कारण लगानीको वातावरण बन्न नसकेको भन्दै उहाँले पछिल्लो समय समग्र निजी क्षेत्रको मनोबल खस्किएको बताउनुभयो । मौद्रिक नीति मार्फत वित्तीय स्थायित्व कायम गर्न एवं व्याजदर नियन्त्रणका लागि सरोकारवाला सरकारी निकायलाई एकै स्वरमा झक्झक्याउनुपर्ने अध्यक्ष मल्लको भनाई छ ।

चेम्बर, परिसंघ र उद्योग वाणिज्य महासंघले आगामी वर्षको मौद्रिक नीतिका लागि विहिबार संयुक्त सुझाव समेत पेश गर्दैछन ।
ब्याजदर नियन्त्रण गरेर वित्तीय क्षेत्रको सुधारका लागि आगामी वर्ष निरन्तर सहकार्य गर्ने विषयमा पनि चेम्बर र परिसंघबीच समझदारी बनेको छ ।

परिसंघका अध्यक्ष राजेश कुमार अग्रवालले मौद्रिक नीतिको प्रभावकारी कार्यन्व्यनका लागि निजी क्षेत्रबीच सहकार्य हुनुपर्नेमा जोड दिनुभयो । आर्थिक विकास र समृद्धि निजी क्षेत्रको चाहना भएको भन्दै अग्रवालले आफुहरुको मागलाई सम्वोधन गर्नका लागि सरकारसंग नियमित छलफल गर्ने वातावरण सिर्जना गर्नुपर्ने बताउनुभयो । उद्यारो कारोबारलाई निरुत्साहित गर्न अभियान चलाउने सम्वन्धमा पनि चेम्बर र परिसंघबीच सहकार्य गर्ने समझदारी बनेको छ ।