युवा उद्यमी मञ्च नेपालको अध्यक्षमा साहारा जोशी चयन 

नेपाल युवा उद्यमी मञ्चको १९ औँ वार्षिक साधारण सभाले हिमालयन ब्याम्बो प्रालिका कार्यकारी निर्देशक साहारा जोशीलाई अध्यक्षमा चयन गरेको छ ।

उद्योग वाणिज्य तथा आपूर्तिमन्त्री रमेश रिजालको प्रमुख आतिथ्यतामा सम्पन्न सभाले साहारा जोशीको अध्यक्षतामा ११ सदस्यीय केन्द्रीय कार्यसमिति चयन गरेको हो । जसमा निवर्तमान अध्यक्ष रितेश लामिछाने, प्रथम उपाध्यक्ष कौशल सुन्दर श्रेष्ठ, द्वितिय उपाध्यक्षमा निभिता प्रधान र महिला उपाध्यक्षमा ऋचा श्रेष्ठ चयन भएका छन् । यस्तै, सदस्यहरुमा सुदिप घिमिरे, पवित्र बहादुर गौतम, आभूषण ज्योती कंसाकार, कृष्ण सापकोटा, यूनेश श्रेष्ठ र दिलासा श्रेष्ठ रहेका छन् । यसभन्दा अघि जोशी नेपाल युवा उद्यमी मञ्चको वरिष्ठ उपाध्यक्षमा रहेकी थिइन् ।

सो कार्यक्रमा बोल्दै मन्त्री रिजालले युवा उद्यमीहरुले उद्यमशिलता विकासका लागि पुर्‍याएको योगदानको विषयमा खुलेर प्रशंसा गरे । यस्तै, सुरुमा आफूलाई युवा उद्यमी मञ्चमाथि विश्वास नरहेको बताउँदै मन्त्री रिजालले भने,’ शुरुमा मैले युवा उद्यमी मञ्चले के नै पो गर्न सक्छन् र ? भन्ने ढंगबाट विश्लेषण गरेको थिए, जून अहिले आएर गलत सावित भएको छ ।’

आफूले युवा उद्यमीलाई नबुझेर गलत विश्लेषण गरेकोमा आत्मसमिक्षा गर्दै मन्त्री रिजालले आगामी दिनहरुमा भने मन्त्रालयको तर्फबाट पूर्ण साथ र सहयोग हुने प्रतिबद्धता जनाए । त्यस्तै, मन्त्रालय र युवा उद्यमीहरुबीच सहकार्य गर्ने कार्यमा समेत आफू सकारात्मक रहेको मन्त्री रिजालको भनाई रहेको थियो ।

देशमा रहेका १२ वटा च्याप्टर र ८०० भन्दा बढी युवा उद्यमी संलग्न संगठनहरुले १ लाख ४० हजार मानिसलाई रोजगारी दिन सफल भएको कुरा अत्यन्तै गर्व गर्न लाएक रहेको मन्त्री रिजालले जनाए । 

त्यस्तै, कार्यक्रमा नेपाल उद्योग वाणिज्य महासंघका अधयक्ष चन्द्रप्रसाद ढकालले युवा उद्यमीहरुले पुर्‍याएको योगदानको प्रशंसा गरे । उनले आजका दिनहरुमा कामको खोजीमा नेपाली युवा विदेश पलायन भएकाले युवा श्रमशक्ति बाहिरिँदै गर्दा झण्डै १ लाख ४० हजार युवालाई मन्च आबद्ध उद्यमीहरुले रोजगारी उपलब्ध गराउनु नै गर्वको विषय भएको बताए । उनले युवा उद्यमी मञ्च नेपाल उद्योग वाणिज्य महासंघ अन्र्तगतका युवा उद्यमी मञ्चको रुपमा स्थापित संस्था समेत रहेको बताए ।

त्यस्तै, ढकालले पूर्व मेची देखि पश्चिम महाकालीसम्म सातै वटा प्रदेशमा आफ्नो च्याप्टर विस्तार गर्न सफल भएकोमा नेपाल युवा उद्यमी मञ्चलाई बधाई एवं धन्यवाद दिए । 

कार्यक्रममा मञ्चकी नवनिर्वाचित अध्यक्ष साहारा जोशीले आफ्नो कार्यकाल सम्झन लाएक बनाउने र एक वर्षको अवधिमा युवा उद्यमीहरुको आवद्धतालाई प्रार्थमिकता दिँदै उनीहरुका समस्या र चुनौतीलाई आत्मसाथ गर्दै क्षमता अभिवृद्धिमा महत्वपूर्ण भूमीका निर्वाह गर्ने बताइन् । 

कार्यक्रममा वर्षभरि उत्कृष्ट कार्य गरेवापत एनवाईईएफ च्याप्टरहरुलाई पुरस्कृत गरिएको थियो । सो अवसरमा नेपाल उद्योग वाणिज्य महासंघका पूर्व अध्यक्ष कुशकुमार जोशी, वरिष्ठ उपाध्यक्ष अन्जन श्रेष्ठ, वस्तुगत उपाध्यक्ष हेमराज ढकाल र एशोसियट उपाध्यक्ष जोत्सना श्रेष्ठको सहभागीता रहेको थियो ।