काठमाडौं । नेपाल राष्ट्र बैंकले सुन आयातको कोटा बढाएको छ । यसअघि आयात गर्न सकिने सुनको दैनिक परिमाण २० किलोग्राम कायम गरिएकोमा हाल यसलाई बढाएर दैनिक २५ केजी पुर्याइएको छ ।
राष्ट्र बैंकले विदेशी विनिमय कारोबार गर्न इजाजतप्राप्त निकायलाई जारी गरिएको एकीकृत परिपत्र २०८१ लाई संशोधन गर्दै सुन आयात र रेमिट्यान्स अप्रवाहको सीमा बढाएको हो ।
केन्द्रीय बैंकले रेमिट्यान्स पनि दैनिक २५ लाखसम्म ल्याउन पाइनेगरी सीमा बढाएको छ । यसअघि इजाजतपत्रप्राप्त विप्रेषण कम्पनी मार्फत सम्बन्धित बेनेफिसियरीको खातामा जम्मा गर्ने गरी दैनिक २० लाखसम्म (एकपटक वा पटक पटक) को विप्रेषण रकम ल्याउन सकिने व्यवस्था रहेको थियो ।
केन्द्रीय बैंकको परिपत्रबमोजिम भित्रिएको विप्रेषणको विवरण मासिक रुपमा प्रत्येक महिना समाप्त भएको सात दिनभित्र विभाग, सम्बन्धित सुपरिवेक्षण विभाग र आर्थिक अनुसन्धान विभागमा पेश गर्नु पर्ने जनाइएको छ ।
प्रतिक्रिया