कोरोना विरुद्धको अभियानमा हातेमालो गर्न व्यवसायीलाई प्रधानमन्त्रीको आग्रह

काठमाडौं। प्रधानमन्त्री शेरबहादुर देउवाले कोरोना महामारी विरुद्ध सरकारले अघि बढाएको अभियानमा हातेमालो गरेर अघि बढ्न उद्योगी व्यवसायीहरूलाई आग्रह गरेका छन् । देउवाले कोरोनाको महामारीलाई परास्त गर्न नेपालका उद्योगी व्यवसायीसहित सबै प्रतिबद्ध हुनु आवश्यक भएको धारणा राखे ।

नेपाल उद्योग परिसंघको १८औँ वार्षिक साधारण सभालाई सम्बोधन गर्दै प्रधानमन्त्री देउवाले मुलुकको लागि विकास लगायतका अन्य धेरै कुराको आवश्यकता रहे पनि सबैभन्दा महत्त्वपूर्ण काम खोपको वितरणमा सरकार लागेको उल्लेख गरे ।

देउवाले मुलुकको पहिलो आवश्यकता जीवनको सुरक्षा भएकोले सरकारले आफ्ना सबै प्रयासलाई कोरोनाको प्रकोप न्यूनीकरण र त्यस विरुद्धको खोपको उपलब्धतातर्फ केन्द्रित गरेको बताए ।

प्रधानमन्त्री देउवाले नव नियुक्त अर्थमन्त्री उत्साही व्यक्ति भएकोले उनले कोभिडको अवस्थाले अप्ठ्यारोमा रहेको मुलुकको अर्थतन्त्रलाई अघि बढाउन भूमिका खेल्ने विश्वास समेत व्यक्त गरे ।

कार्यक्रममा अर्थमन्त्री जर्नादन शर्माले मुलुकको अर्थतन्त्रलाई अघि बढाउन सरकार निजी क्षेत्रको साथ लिएर अघि बढ्ने बताए ।

अर्थमन्त्री शर्माले उद्योगी व्यवसयीहरुको पहलमा अघि सारिएको मेक इन नेपाल अभियान नेपालको आर्थिक विकास, रोजगारी सिर्जना, आयातको प्रतिस्थापन र निर्यात प्रवर्द्धनमा सहयोगी हुनु आवश्यक भएको बताए ।

अर्थमन्त्री शर्माले मेक इन नेपाल अभियान अन्तर्गत नेपालमा निर्माण हुने वस्तुहरू गुणस्तर, परिमाण तथा मूल्यका दृष्टिले समेत विश्वव्यापी रूपले प्रतिस्पर्धी हुनु पर्नेमा जोड दिए ।

अर्थ मन्त्री शर्माले स्थानीय स्तरमा साना उद्योगहरूको व्यापक सञ्जाल निर्माण गरेर साना उद्योगहरूको बीचमा ठुला उद्योग निर्माण गर्नु आवश्यक भएकोमा पनि जोड दिए ।

नेपालको आयातमुखी अर्थतन्त्रलाई निर्यातमुखी बनाउन उद्योग क्षेत्रलाई प्रतिस्पर्धी र प्रविधियुक्त बनाउनु पर्नेमा पनि उनले जोड दिए ।

कार्यक्रममा नेपाल उद्योग परिसंघका संस्थापक अध्यक्ष विनोद चौधरीले सरकारले कोरोनाको खोपको प्रबन्ध गरी नेपाललाई दक्षिण एसियाको आकर्षक लगानी गन्तव्यको रुपमा अघि बढाउनु पर्ने बताए ।

नेपाल उद्योग परिसंघका अध्यक्ष शतिषकुमार मोरले सरकार, उद्योगी व्यवसायी र सर्वसाधारण उपभोक्ताहरूले नेपालमा उत्पादन हुने वस्तुहरूको उपभोगमा जोड दिए मात्र मुलुकको व्यापार घाटा कम गर्न सकिने उल्लेख गरे ।

स्वदेशी उत्पादन देशको शान, यसको उपभोग हाम्रो अभियान भन्ने नाराका साथ आयोजना गरिएको उद्घाटन समारोहमा नेपाल उद्योग परिसंघका उपाध्यक्षहरू अनुज अग्रवाल, निर्वाण चौधरी लगायतका वक्ताहरूले मेक इन नेपालको विभिन्न पक्षमा चर्चा गरेका थिए ।

परिसंघको साधारणसभाले आगामी कार्यकालका लागि नेतृत्व समेत चयन गर्ने कार्यक्रम रहेको छ ।