वाइडबडीको पहिलो उडान आज, काठमाडौं–दोहाको दुईतर्फी भाडा १८ हजार

काठमाडौं । राष्ट्रिय ध्वजावाहक नेपाल वायुसेवा निगमले खरिद गरेको वाइडबडी एयरबस ए३३०–२०० जहाजले आज कतारको दोहामा पहिलो व्यावसायिक उडान गर्दैछ ।

निगमले १ महिना पहिलो भित्र्याएको अन्नपूर्ण जहाजमार्फत सेवाग्राहीलाई निकै सस्तो दरमा दोहा उडानको अफरसमेत ल्याएको छ । जसअन्तर्गत एकतर्फी टिकेटको ११ हजार तथा दुईतर्फी भाडा १८ हजार निर्धारण गरेको छ ।

अन्नपूर्ण जहाजले नेपाल नागरिक उड्ययन प्राधिकरणबाटसञ्चालन अनुमतिपत्र (एओसी) पाएसँगै अन्तर्राष्ट्रिय उडान सुरु गरेको हो ।
प्रधानमन्त्री केपी शर्मा ओलीले निगमको जहाज १ महिनादेखि उड्न नसकेको भन्दै चासो राखेपछि एओसी पाएको तीन दिनमै जहाजको व्यावसायिक उडान सुरु गरिएको हो ।

गत असार १४ गते काठमाडौं अवतरण भएको निगमको यो जहाजमा २ सय ७४ सिट रहेका छन् ।
निगमले यस रुटमा बिजनेस क्लासमा यात्रा गर्नेलाई ५५ किलो र इकोनोमी क्लासमा यात्रा गर्नेलाई ४५ किलोसम्मको लगेज सुविधा पनि दिएको छ ।