गभर्नर अधिकारीको मुद्दामा सर्वोच्चद्वारा अन्तरिम आदेशलाई निरन्तरता

नेपाल राष्ट्र बैंकका गभर्नर महाप्रसाद अधिकारीको मुद्दामा सर्वोच्च अदालतले अन्तरिम आदेशलाई निरन्तरता दिएको छ ।

न्यायाधीशद्वय सपना प्रधान मल्ल र टंकबहादुर मोक्तानको संयुक्त इजलासले अदालतको अन्तरिम आदेशलाई निरन्तरता दिएको हो ।

गत चैत २५ गते बसेको मन्त्रिपरिषद्को बैठकले सरकारलाई असहयोग गरेको र सरकारी सूचना चुहावट गरेको आरोपमा अधिकारीलाई निलम्बन गरी छानबिन समिति गठन गरेको थियो । सरकारले निलम्बन गरेसँगै अधिकारीले आफूलाई गैरकानुनी रुपमा पदकबाट निलम्बन गरेकाले पुनर्बहालीको माग राख्दै सर्वोच्चमा रिट दिएका थिए । 

उनको रिटमा वैशाख ६ गते न्यायाधीश हरि फुयालको एकल इजलासले गभर्नरमाथि छानविन प्रक्रिया अघि नबढाउन र पदमा रहेर काम गर्न दिन अन्तरिम आदेश जारी गरेको थियो ।