करिब ११ करोड नाफामा सोल्टी होटल

सोल्टी होटल लिमिटेडले चालू आर्थिक वर्षको तेस्रो त्रैमासिक वित्तिय विवरण सार्वजनिक गरेको छ ।

विवरण अनुसार तेस्रो त्रैमाससम्ममा कम्पनीले १० करोड ८५ लाखभन्दा बढी खुद नाफा आर्जन गरेको छ । गत वर्षको यसै अवधिसम्ममा कम्पनी १३ करोड ६६ लाखभन्दा बढी खुद नोक्सानीमा रहेको थियो ।

कम्पनीको आम्दानी यस वर्ष करीब १४१ प्रतिशतले बढेका छ । गत वर्ष ३० करोड ८७ लाख रुपैयाँ आम्दानी गरेको कम्पनीले यस वर्ष ७४ करोड ३८ लाख आम्दानी गरेको छ । हाल कम्पनीको चुक्तापूँजी ८४ करोड २५ लाख ७९ हजार रहेको छ । यस्तै, जगेडा कोष रकम ६९ करोड ८२ लाखभन्दा बढी भएको छ । गत वर्षको तुलनामा कम्पनीको कुल सम्पत्ति ७ दशमलव ६१ प्रतिशत र कुल दायित्व २१ दशमलव ९४ प्रतिशतले बढेको छ ।

कम्पनीको प्रतिशेयर आम्दानी १ दशमलव २९ र प्रतिशेयर नेटवर्थ १८ दशमलव २९ रहेको छ ।