काठमाडौं । काठमाडौं महानगरपालिकाका मेयर बालेन शाहको पछिल्लो एक साताको गतिविधि हेर्ने हो भने उनी बिजुली गतिमा छन् । पार्किङको नक्सा पास गरेर व्यापारिक प्रयोजनमा उपयोग गर्ने काठमाडौंका घरधनीहरुका लागि उनी आतंक जस्तै भएका छन् ।
नयाँ वानेश्वर, न्यूरोड, सुन्धारा लगायतका क्षेत्रमा एक्सनमा उत्रिएका बालेन बिहीबार झनै चर्चामा रहे । राजनीतिक पहुँचका आधारमा कानुनलाई हातमा लिँदै आएका व्यवसायी उनको निशानामा परे ।
नयाँ वानेश्वरस्थित अल्फाबिटाले सञ्चालन गरिरहेको अल्फा केयरमा बिहान अनुगमनमा जाँदा सञ्चालक द्विराज शर्माले बालेनसँग नक्सा मागे । बालेनसँग उनको चर्काचर्की पनि पर्यो । नक्सा कोसँग हुन्छ भन्ने विवादकै बीच बालेन फर्किए ।
तर, बालेन रोकिएनन् । महानगरपालिका पुगेर नक्सा खोजे र पुनः फर्किए अल्फाबिटा। यसपटक भने नक्सासँगै डोजर पनि लिएर गएका थिए । एकछिनको अनुगमनपछि उनले डोजर चलाउन अनुमति दिए र अल्फा क्प्प्लेक्सको बाहिरपट्टी रहेको मेडिकल क्षणभरमै भत्कियो ।
शर्मा एमाले निकट हुन् । एमाले अध्यक्ष केपी ओलीसँग उनको पारिवारिक सम्बन्ध पनि छ । द्विराजका दाजु शिक्षा व्यवसायी युवराज शर्माले केपी ओली प्रधानमन्त्री रहँदा उनको जन्मदिन मनाउन तेह्रथुमस्थित घरमा चाँजोपाँचो मिलाएका थिए ।
केकमा नेपालको नक्सा काटिएको भन्दै आलोचित उक्त केकको ढुवानी लागत २५ लाख रहेको भन्दै चर्चा भएको थियो ।
अल्फाबिटा अपरेसनपछि उनले फेसबुकमा यस्तो लेखेः
उहाले आफ्नै नक्सा मलाइ माग्नु भयो ।
मैले अफिस गएर नक्सा र डोजर लिएर गए ।
मैले के बिराए ।
अब उपरान्त यस्तो गर्न नपरोस , सबैले आफै बुझेर अबैधानिकरुप मा बनाइएको सम्रचना हटाइ दिनु होला । नक्सा जसरी पास भएको छ , त्यहि अनुसार बनाइ दिनु होला ।
प्रतिक्रिया