प्रधानमन्त्री पुष्पकमल दाहाल ‘प्रचण्ड’ले मोबाइल डिभाइस म्यानेजमेन्ट सिस्टम (एमडीएमएस) लागू नगर्न निर्देशन दिएका छन् ।
नेपाल दूरसञ्चार प्राधिकरणको निर्णय अनुसार शुक्रबारदेखि एमडीएमएसमा दर्ता नभएका मोबाइल नचल्ने नियम लागू गर्ने भनिएपनि दाहालले तत्काललाई सो नियम लागू नगर्न निर्देशन दिएका हुन् ।
प्राधिकरणले यस अघि नै सूचना जारी गर्दै दर्ता नगरिएका मोबाइल पुस १५ देखि नचल्ने बताएको थियो।
यस्तै, गैरआवासीय नेपालीले भने प्राधिकरणको सो निर्णयको विरोध गर्दै आइरहेको थियो । प्रवासी नेपाली मञ्च, अन्तर्राष्ट्रिय कमिटीले वर्षौँ विदेशमा पसिना बगाएर परिवारलाई उपहारको फोन र ल्यापटप ल्याउँदा भन्सार अनिवार्य गर्ने सरकारको निर्णय खारेज गर्न माग गरेको थियो ।
कमिटीले एक विज्ञप्ति जारी गर्दै भनेको छ “विदेशमा वर्षौँसम्म रगत, पसिना बगाएर आफ्नो जहान परिवारलाई एउटा मोबाइल र छोराछोरीका लागि एउटा ल्यापटप ल्याउँदा पनि भन्सार लिनु भनेको प्रवासी श्रमजीवी नेपालीमाथिको निर्मम शोषण हो । लाखौँ प्रवासी नेपालीको विप्रेषणले देशको मुख्य अर्थतन्त्र धानेको विषय सरकारलाई अवगत नै छ ।”
प्रतिक्रिया