काठमाडौं । चालू आर्थिक वर्षमा नेपालीको प्रतिव्यक्ति आय अघिल्लो वर्षभन्दा बढ्न सकेको छ्रैन ।
चालू वर्ष वार्षिक १ हजार ३ सय ९९ अमेरिकी डलर पुगेको भए पनि गत आर्थिक वर्षको संशोधित प्रतिव्यक्ति आय समेत १ हजार ३ सय ९९ अमेरिकी डलर रहेका कारण चालू वर्ष नेपालीको आम्दानी बढ्न सकेको छैन ।
डलरसँगको विनिमय दरअनुसार नेपाली रुपैयाँमा यो १ लाख ८२ हजार ६ सय ८३ रुपैयाँ बराबर हो ।
गत वर्ष नेपालीको प्रतिव्यक्ति आय १ लाख ६९ हजार ३८ रुपैयाँ थियो ।
यसरी नेपाली रुपैयाँमा प्रतिव्यक्ति आय बढेको देखिए पनि अमेरिकी डलरमा गत वर्षकै बराबर छ ।
नेपाली रुपैयाँमा वृद्धि देखिए पनि अमेरिकी डलरमा बराबरी रहेका कारण विनिमय दरका कारणले मात्र नेपालीको आम्दानी बढी देखिएको राष्ट्रिय तथ्यांक कार्यालयका निर्देशक इश्वरीप्रसाद भण्डारीले बताए ।
राष्ट्रिय तथ्यांक कार्यालयले मंगलबार सार्वजनिक गरेको आर्थिक वर्ष ०७९÷८० को वार्षिक राष्ट्रिय लेखा तथ्यांक सम्बन्धी प्रतिवेदनमा यो वर्ष थोरैले भएपनि कुल गार्हस्थ्य उत्पादन (जीडीपी)को आकार बढेकाले प्रतिव्यक्ति आय नेपाली रुपैयाँमा सोही दरले बढेको देखिएको छ ।
उनका अनुसार गत आर्थिक वर्षको संशोधन र यो आर्थिक वर्षको प्रारम्भिक प्रतिव्यक्ति आय बराबर देखिन गएको हो ।
प्रतिक्रिया