ललितपुर उद्योग वाणिज्य संघको अध्यक्षमा रुपक महर्जनको उम्मेदवारी घोषणा

उद्योग वाणिज्य संघ ललितपुरका महासचिव रुपक महर्जनले आगामी निर्वाचनमा अध्यक्ष पदमा उम्मेदवारी दिएका छन्। 

आज काठमाडौंमा पत्रकार सम्मेलनको आयोजना गर्दै उनले असोज १९ र २० गते ललितपुरमा हुन गएको ललितपुर उद्योग वाणिज्य संघको वार्षिक साधारण सभा एवं निर्वाचनमा अध्यक्षको उम्मेदवारी घोषणा गरेका हुन् । 

उक्त पत्रकार सम्मेलनमा उनले ऐजेण्डामा समावेश सम्पूर्ण कामहरु सफल पार्न नसके पनि केही नमूना काम गरेर देखाउन उम्मेद्वारी दिएको बताएका छन् । उनले ललितपुरमा आवश्यक विकास हुन नसकेको भन्दै उद्योग वाणिज्य संघको नेतृत्वमा आएको खण्डमा तीन तहको सरकारसँग प्रस्ताव गरेर केही विकासका कामहरु गर्ने पनि बताए । 

उनले भने, ‘हाम्रो ऐजेण्डा पूर्ण रुपमा सफल पार्न नसके पनि केही मात्रामा नमूनाको कामहरु गरेर देखाउँने छौ । मसँग क्षमता छ, म सक्षम छु भन्ने हिसाबले नै मैले चुनाव जित्छु भन्ने आशा लिएको छु । ललितपुरमा अझै विकासका कामहरु गर्न नसकेको हुनाले सिंगो ललितपुर उद्योग वाणिज्य संघको नेतृत्वमा आएको खण्डमा हामी यसमा तीन तहको सरकारसँग प्रस्ताव गरेर केही विकासका कामहरु गर्न खोज्ने हाम्रो ऐजेण्डा रहेको छ ।’ 

उनले विश्वव्यापी आर्थिक मन्दी र देश भित्रकै समेत असहज व्यवसायिक वातावरणको सिर्जना भएको अवस्थामा दृढ आत्मविश्वास, सबल सहकार्यले चुनौतीहरुलाई उपलब्धिमा परिणत गर्न सक्ने उनले बताए ।  

उनले भने, ‘विश्वव्यापी आर्थिक मन्दी र देश भित्रकै समेत असहज औद्योगिक र व्यवसायिक वातावरणको उपज धेरै उद्योगी व्यवसायीहरुले अत्यन्त कठिन संघर्ष गर्नु परिरहेको छ । हरेक चुनौती कुनै न कुनै सम्भावनाहरु बोकेर आउने र दृढ आत्मविश्वास सबल सहकार्य र सुझ बुझपूर्ण योजना र कार्यान्वयनले चुनौतीहरुलाई उपलब्धिमा परिणत गर्न सक्ने कुरामा पूर्ण रुपमा विश्वत छौं ।’ 

सबैको साथ र सहयोग रहेमा, ललितपुर जिल्लालाई उद्योगी व्यवसायीको उर्वर भूमिको रुपमा विकास गर्न कार्यहरु प्रभावकारी रुपमा अगाडि बढाउने पनि उनको भनाई छ ।