भूकम्प पीडितलाई रत्न तथा आभूषण संघको सहयोग 

भूकम्पबाट पीडित जाजरकोटका बालबालिकाहरुका लागि नेपाल रत्न तथा आभूषण संघले तीन सय पिस न्यानो ब्लाङ्केट, स्टेशनरी सामाग्री तथा स्थानीय महिलाका लागि स्यानेटरी प्याड उपलब्ध गराएको छ ।

संघले जाजरकोटको बारकोट गाँउपालिका वडा ९ मा रहेको पूर्णज्योति प्रा.वि द्धारा संचालित न्यानो कार्यक्रम २०८० मा आबद्ध भई पीडित विद्यार्थीहरुलाई सहयोग गरेको हो ।

सो अवसरमा रत्न तथा आभूषण संघका केन्द्रिय सदस्य एवं संघद्धारा गठित सिएसआर टिमका संयोजक लोप्साङ छोडेन शेर्पा लामाले कार्यक्रममा आबद्ध भएर बालबालिकालाई सहयोग गर्न पाउनु असाध्यै खुसीको कुरा रहेको बताइन् ।

‘हाम्रो अथक मिहिनेत, हाम्रा सदस्य ज्वेलर्स साथीहरुको सहयोग र संघको सक्रियताले भूकम्प पीडितहरुलाई थोरै भएपनि सहयोग गर्न पाउनु गर्भको कुरा हो’, उनले भनिन् ।

यस्तै, सामाजीक उत्तर दायीत्व अन्तर्गत संघले विगतका दिनहरुदेखि नै यस प्रकारको सहयोग गर्दै आइरहेको संघका संस्थापक अध्यक्ष शुरेशमान श्रेष्ठले बताए ।