काठमाडौं । निर्देशक विशाल भण्डारीसहित केही प्रतियोगी दुर्घटनामा परेपछि रियालिटी शो ‘कमेडी च्याम्पियन:सिजन थ्री’को नयाँ एपिसोड सुटिङ हुन सकेको छैन ।
बिहीबार पुरानै कार्यक्रमलाई काँटछाँट गरी प्रशारण गरिएको छ । शुक्रबार पनि नयाँ एपिसोड प्रशारणको सम्भावना नरहेको बताइएको छ ।
गत साता नगरकोटबाट फर्कने क्रममा विशालले चलाएको गाडी दुर्घटनामा परेको थियो ।
भण्डारीसहित ६ जना चढेको कार भक्तपुरको जगातिमा दुर्घटनाग्रस्त हुँदा प्रतियोगी सुशान्त बस्याल गम्भीर घाइते भएका छन् ।
गाडीमा सवार पवन भट्टराई र रजनिश अर्याल डिस्चार्ज भएका छन् भने प्रकृती गिरी अस्पतालमै छिन् ।
भण्डारीमाथि मापसे गरेर गाडी चलाएको आरोप छ । उनी दुई दिन प्रहरी हिरासतमा बसेर हाजिरी जमानतमा छुटेका हुन् ।
कमेडी च्याम्पियनका जज प्रदीप भट्टराईसमेत पछिल्ला कार्यक्रममा अनुपस्थित हुँदा रियालिटी शो भद्रगोल बनेको छ ।
कार्यक्रममा उनी बिरामी भएको बताइए पनि भट्टराई आफ्नो फिल्म महाजात्राको प्रमोशनमा व्यस्त छन् ।
प्रतिक्रिया