होटलको संख्या बढे अनुरुप पर्यटक वृद्धि नगण्यः शाह

काठमाडौं । होटल संघ नेपालले मुलुकभर होटल निर्माणको क्रम बढ्दै गए पनि पर्यटक आगमनमा आएको वृद्धि नगण्य रहँदा अधिकांश होटलहरु न्यून क्षमतामा सञ्चालन भइरहेको जनाएको छ ।

उपप्रधान तथा अर्थमन्त्री विष्णु पौडेलसँगको भेटमा संघका अध्यक्ष विनायक शाहले होटलको संख्या तथा क्षमता बढे अनुरुप माग बढ्न नसकेको हुँदा आउँदो मौद्रिक नीति लगायतका सरकारी पहल आवश्यक रहेको बताए । उनले विवरण संघको तर्फबाट ज्ञापनपत्र पेश गर्दै पर्यटक बढाउने कार्यक्रमका लागि आग्रह पनि गरे ।

प्रत्युत्तरमा अर्थमन्त्री पौडेलले बढ्दै गएको होटल संख्याको अनुरुप विद्यमान माग बढाउँदै क्षमता उपयोग गर्न नीतिगत सुधार गर्नेतर्फ सरकार सक्रिय रहेको बताए ।

पौडेलले बढ्दै गएको होटलहरुको संख्या र क्षमता उपयोग गर्न भैरहवा र पोखरा क्षेत्रीय अन्तर्राष्ट्रिय विमानस्थलहरुमा अन्तर्राष्ट्रिय उडान बढाउनुका अतिरिक्त पपर्यटकीय तथा राष्ट्रिय महत्वका पोखरा, चितवन, लुम्बिनी राजमार्गहरुको विस्तार र स्तरोन्नति निश्चित समयभित्र सम्पन्न गराउन सरकार प्रतिबद्ध रहेको जानकारी दिए ।

आउँदो मौद्रिक नीतिमा पर्यटन÷होटल क्षेत्रको स्थायित्व तथा प्रवर्द्धन गर्न अभिप्रेरित रहने बताउँदै व्यवसायीहरुले लामो समयदेखि होटल क्षेत्रलाई उद्योग सरहको मान्यता दिने माग प्रति सरकार सकारात्मक रहेको र नीतिगत सुधार गर्ने उनको भनाइ छ ।

नेपालआउने भारतीय पर्यटकहरुबाट त्यहाँको खर्च गर्ने सीमा तथा व्यवस्था, आन्तरिक पर्यटन बढाउने लगायत होटल संघ नेपालले उठाएका पर्यटन विकास विस्तारका विषयहरुमा मन्त्रालय सकारात्मक रहेको मन्त्री पौडेलले बताए ।

प्रतिनिधिमण्डलमा संघका द्वितीय उपाध्यक्ष दिनेश तुलाधर, कोषाध्यक्ष युवराज श्रेष्ठ, कार्यसमिति सदस्यहरु सीपी श्रेष्ठ र जयदीन श्रेष्ठको उपस्थिति रहेको थियो ।