काठमाडौं । मंगलबार रातिको भारी वर्षाका कारण च्यासलस्थित तुल्सीलाल स्मृति प्रतिष्ठानमा रहेको सत्तारुढ नेकपा एमालेको केन्द्रीय कार्यालय भवन डुबानमा परेपछि बिहीबार सचिवालय बैठक होटलमा आयोजना गर्नुपर्यो ।
पार्टी अध्यक्षसमेत रहेका प्रधानमन्त्री केपी शर्मा ओलीले सरकारी निवास बालुवाटारमा पार्टी बैठक नगर्ने ‘सकारात्मक’ निर्णय गरेका छन् । तर, बैठकका लागि उनले छनोट गरेको होटलले भने त्यो सकारात्मक ऊर्जामा संशय पैदा गरेको छ ।
एमाले सचिवालय बैठक सिंहदरबारको दक्षिणी गेट नजिकै रहेको होटल बसेरामा जारी छ । बुटिक होटलतर्फ पाँचतारे स्तरको यो होटल लामो समयदेखि एमाले निकट रहेका धादिङका व्यवसायी विशाल पण्डितको हो ।
पण्डित देशैभर स्वास्थ्य उपकरणमा ठूलो चलखेल गर्ने मुख्य पात्र मानिन्छन् । उनीविरुद्ध अख्तियार दुरुपयोग अनुसन्धान आयोगले मेडिकल उपकरण खरिदमा अनियमितता गरेको कसुरमा विशेष अदालतमा भ्रष्टाचार मुद्दासमेत दायर गरेको छ ।
कोशी प्रादेशिक अस्पतालका लागि उपकरण खरिद गर्ने क्रममा कम कबोल गर्नेलाई ठेक्का नदिई बढी कबोल गर्ने पण्डितको कम्पनीलाई खरिदको जिम्मा दिइएको थियो ।
पण्डित कोभिडको बेलामा पनि मेडिकल सामग्री खरिदका क्रममा विवादमा आएका व्यक्ति हुन् । उनीविरुद्ध करिब तीन करोड बिगो मागदाबी गरिएको छ ।
प्रतिक्रिया