पर्यटन  व्यवसायका नयाँ पुस्तालाई वर्तमान अवस्थासँग अभ्यस्त गराउन पर्यटन बोर्डको पहल

काठमाडौं,  नेपाल पर्यटन  व्यवसायीहरूको आगामी पुस्तालाई बर्तमानसँग अभ्यस्त गराउने उद्देश्यले नेपाल पर्यटन बोर्डले आज एउटा पहलको शुभारम्भ गरेको छ।

 नेपाल पर्यटन बोर्डको सभाकक्षमा आयोजना गरिएको “Empowering Future Tourism Leaders: Sharing Knowledge & Growth” शीर्षकको मासिक शृङ्खलाको उट्घाटन सत्रमा शुभश्री कलेज अफ म्यानेजमेन्टको ब्याचलर अफ होटल म्यानेजमेन्ट कार्यक्रमका  ६५ विद्यार्थीहरू सहभागी थिए।

नेपाल पर्यटन बोर्डका (CEO) कार्यकारी प्रमुख दीपकराज जोशीले कार्यक्रमको महत्वलाई जोड दिँदै भने, “यो हाम्रो पर्यटनको भविष्य प्रवर्द्धन गर्ने पहल हो। हामी यस क्रममा भाइबहिनी र उद्योगीहरूको साथको अपेक्षा गर्दछौं ।” यस्तै अहिलेको पर्यटनको प्रवृति Experience travel  को रहेको पनि उनकाे भनाइ छ ।

कार्यक्रममा बोल्दै बोर्डका वरिष्ठ निर्देशक हिक्मत सिंह ऐरले यो कार्यक्रमले बिद्यार्थी भाइबहिनीहरूलाई जागिर उन्मुख हुने भन्दा पनि उद्यमी बन्न जोड लगाउनुपर्ने बताए। बोर्डका वरिष्ठ प्रवन्धक विमल कँडेलले नेपालका अनुपम पर्यटकीय सम्पदाहरुको बारेमा प्रस्तुतिकरण गरेका थिए ।

कार्यक्रममा सुभश्री कलेजका प्राचार्य मनिता ओलीले युवा जनशक्तिले हरेक समय केही न केही सिकिरहनु पर्ने र यस कार्यक्रमले पनि सबैलाई सिक्ने मौका दिएको बताइन् ।   

यस पहलले उद्योग विशेषज्ञता र उदीयमान प्रतिभाहरू बीचको खाडललाई कम गर्दै आवश्यक वातावरण सिर्जना गर्नेछ भन्ने आशा बोर्डको रहेको छ।साथै यसले सिकाइ, सहकार्य र नवप्रवर्तनलाई बढावा दिनेछ। यस सत्रले अनुभवी पेशा व्यवसायीहरु, शिक्षकहरू, र विद्यार्थीहरूलाई पर्यटनमा नवीनतम प्रवृत्तिहरू छलफल गर्न र भविष्यका अवसरहरू अन्वेषण गर्न अभिप्रेरित गर्नेछ । सहभागीहरूले अनुभव साटासाट र एकअर्कालाई प्रेरणा दिने मौका पाउनेछन्।

सहभागी हुन चाहने अन्य कलेज, शैक्षिक संस्थाहरूले यस कार्यक्रममा संलग्न हुनको लागि पर्यटन सम्पदा तथा संसाधन विकास (TP& RD) महाशाखाको पर्यटन क्षमता बिकास (HRD) एकाइमा सम्पर्क गर्नुपर्ने हुन्छ । “यो पहल ज्ञान हस्तान्तरणको लागि मात्र होइन, यो हाम्रो पर्यटन उद्योगको भविष्यलाई आकार दिने युवा नेताहरू बनाउने अभियान हो,“ श्री जोशीले थपे ।

कार्यक्रमको सञ्चालन बोर्डका अधिकृत रिखीमाया राइले तथा कार्यक्रमको समन्वय बोर्डका वरिष्ठ अधिकृत सुधन सुबेदीले गरेका थिए ।

नेपाल पर्यटन बोर्ड नेपालमा दिगो पर्यटन प्रवद्र्धन गर्न र प्रमुख पर्यटन गन्तव्यको रूपमा देशको छवि बढाउन प्रतिबद्ध छ। नवीन कार्यक्रमहरू र साझेदारीहरू मार्फत, बोर्डले पर्यटन उद्योगको विकासलाई दीर्घकालीन सुनिश्चित गर्ने लक्ष्य राखेको छ।