काठमाडौं । नेपाली कांग्रेस बागमती प्रदेश संसदीय दलले दलको नेता फर्ने भएको छ ।
कांग्रेस प्रदेश सभापतिसमेत रहेका इन्द्र बानियाँलाई दलको नेता बनाउन बहुमत जुटेको छ भने हालका नेता तथा मुख्यमन्त्री बहादुर लामाले राजीनामा दिने संकेत गरेका छन् ।
लामा क्याबिनेटमा रहेका चार जना मन्त्रीले शुक्रबार राजीनामा दिएका छन् ।
राजीनामा दिनेमा युवा तथा खेलकुदमन्त्री मीनकृष्ण महर्जन, आन्तरिक मामिला तथा कानुनमन्त्री सुरजचन्द्र लामिछाने, संस्कृति तथा पर्यटनमन्त्री विमल ठकुरी र सहकारी तथा गरिबी निवारणमन्त्री मधुकुमार श्रेष्ठ रहेका छन् ।
यसमध्ये महर्जन कांग्रेस नेता उदयशमशेर राणा निकट हुन् भने लामिछााने महामन्त्री गगन थापा निकट मानिन्छन् ।
लामाले राजीनामा नदिए संसदीय दलको नेताबाट हटाइने र उनी स्वतः पदमुक्त हुने जनाइएको छ ।
२०७९ पुसमा भएको कांग्रेस संसदीय दलको निर्वाचनमा बागमती प्रदेश सभापति बानियाँ लामासँग ५ मतले पराजित भएका थिए ।
बानियाँ संस्थापन पक्षमै रहे पनि पछिल्लो समय नेता प्रकाशमान सिंह निकट हुँदै गएका छन् भने लामा डा. प्रकाशशरण महतनिकट मानिन्छन् ।
प्रतिक्रिया