काठमाडौं । नेपाल क्रिकेट संघ (क्यान)ले गत वर्ष सम्पन्न नेपाल प्रिमियर लिग (एनपीएल)को खर्च विवरण सार्वजनिक गरेको छ ।
प्रतियोगिताबाट क्यानको कुल नाफा २ करोड ४६ लाख ५० हजार ७८९ रुपैयाँ भएको छ ।
बिहीबार कार्यसमिति बैठकमा विवरण सार्वजनिक गरेको हो ।
क्यानका अनुसार, प्रतियोगिताको ‘टोटन ग्रस रेभेन्यु’ २७ करोड ६९ लाख ६४ हजार १ रुपैयाँ रहेको छ ।
यसमध्ये प्रतियोगिता आयोजनाका निम्ति कुल २० करोड १५ लाख ७३ हजार ५९९ रुपैयाँ खर्च भएको छ ।
आठ क्लबसँग राजस्व बाँडफाँट गर्नुअघिको आम्दानी सात करोड ५३ लाख ९१ हजार २५९ रुपैयाँ रहेको छ ।
यसमध्ये आठ फ्रेन्चाइज क्लबलाई ५० प्रतिशत समान रूपमा वितरण गरेपछि क्यानले तीन करोड १६ लाख ५० हजार ७८९ रुपैयाँ आम्दानी भएको जनाएको छ ।
क्यानले चार करोड ३७ लाख ४० हजार ४७० रुपैयाँ आठ क्लबलाई बाँडिएको जनाएको छ । यसैगरी क्यानले तीन करोड १६ लाखमध्ये प्रदेशहरूलाई ७० लाख रुपैयाँ राजस्व बाँडिएको छ ।
प्रतियोगिताको पहिलो संस्करण गत वर्ष मंसिर १५ गतेदेखि पुस ६ गतेसम्म कीर्तिपुरस्थित त्रिवि क्रिकेट मैदानमा आयोजना भएको थियो ।
प्रतियोगिताको दोस्रो संस्करणका निम्ति क्यानले नोभेम्बरको समय तोकेको छ । तर, हालसम्म निश्चित मिति भने सार्वजनिक भइसकेको छैन ।
प्रतिक्रिया