घरबाहिरै निस्कन नपाउने लकडाउनमा अर्को पालिका जान नपाउने निर्णयको औचित्य के ?
काठमाडौं । शनिबारको मन्त्रिपरिषद् बैठकले लकडाउन कडा पार्ने निर्णय ग¥यो । जसअनुसार अब एक प्रदेशबाट अर्को प्रदेश, एक जिल्लाबाट अर्को जिल्ला तथा एक स्थानीय तहबाट अर्कोमा जान नपाइने भएको छ ।
नेपालमा थप तीन व्यक्तिमा कोरोनाभाइरस सक्रमण भएको पुष्टि भएपछि सरकारले देशव्यापी रूपमा आवागमनमा लगाएको प्रतिबन्ध अझ प्रभावकारी बनाउने तथा विदेशबाट फर्किएका र क्वारन्टीनमा रहेका व्यक्तिको परीक्षण गर्ने निर्णय गरेको हो ।
तर, सरकारी निर्णयले लकडाउनको औचित्यमाथि नै प्रश्न उठेको छ । यसअघि झन्डै दुई साताअघि गरिएको लकडाउनले आम नागरिकका दैनिक गतिविधि घरभित्रै सीमित गरिदिएको थियो ।
नागरिक घरभित्रै थुनिएपछि अर्को प्रदेश, जिल्ला वा स्थानीय तह (पालिका) जानसक्ने कुनै सम्भावना थिएन । एकाध घटनाबाहेक आम नागरिकले यसलाई पालना पनि गरिरहेकै थिए ।
शनिबारको मन्त्रिपरिषद् बैठकपछि लकडाउन कडा भएको हो कि खुकुलो भन्ने अर्को प्रश्न खडा भएको छ । अर्को प्रदेश, जिल्ला वा पालिका जान कडाइ गरिएको भन्नुको अर्थ कतै आफ्नै जिल्ला, पालिका वा टोलभित्र अब खुला गरिएको त हैन भन्ने प्रश्न उठेको छ ।
त्यसो होइन र लकडाउन खुला नै छ भने शनिबारको मन्त्रिपरिषदको निर्णय गरिरहनुपर्ने विषय नै होइन । यो ज्यादै हलुका भयो । लकडाउन कार्यान्वयनको समीक्षा गर्दै यसलाई थप प्रभावकारी बनाउनेमात्र भनिएको भए हुन्थ्यो तर यसरी सीमा तोकिएपछि अर्को भ्रम पैदा भएको छ ।
प्रतिक्रिया