काठमाडौं । महाधिवेशन विवादमा अलमलिएको कांग्रेस नियमित बैठकसम्म गर्न नसक्ने स्थितिमा पुगेको छ ।
नेपाली कांग्रेसको केन्द्रीय कार्यसमिति बैठक फेरि सरेको हो ।
कांग्रेस मुख्य सचिव कृष्णप्रसाद पौडेलले बिहीबारका लागि बोलाइएको बैठक शनिबारसम्मका लागि सरेको जानकारी दिए ।
बैठक शनिबार दिउँसो १ बजे पार्टी केन्द्रीय कार्यालयमा बस्ने जनाइएको छ ।
यसअघि कांग्रेसले ३० कात्तिकमा सूचना जारी गरेर १ मंसिरका लागि बोलाइएको बैठक स्थगित गरेर आज (बिहीबार) का लागि बोलाएको थियो ।
बैठकमा पार्टीको विशेष महाधिवेशन वा नियमित महाधिवेशन भन्नेमा बहस हुँदै आएको छ ।
विशेष महाधिवेशनका लागि हस्ताक्षर संकलन समेत भइसकेको अवस्थामा संस्थापनपक्षका नेताहरू भने चुनावपछि नै नियमित महाधिवेशन गर्नुपर्ने अडानमा छन् ।
गत २८ असोजबाट सुरू भएको बैठकमा गत कात्तिक २७ गतेसम्म नेताहरूले धारणा राख्ने क्रम सकिएको हो । त्यसपछि बैठक बारम्बार स्थगित भइरहेको छ ।
प्रतिक्रिया