देउराली–जनता फर्मास्यूटिकल्सले चितवनमा ४७५ करोडको नयाँ औषधि उद्योग स्थापना गर्ने

काठमाडौं । स्वदेशमै अत्यावश्यक औषधि उत्पादन गर्दै आएको अग्रणी औषधि उद्योग देउराली–जनता फर्मास्यूटिकल्स प्रा. लि. ले चितवनको भरतपुरमा अत्याधुनिक नयाँ औषधि कारखाना निर्माण गर्ने निर्णय गरेको छ ।

कम्पनीले उक्त परियोजनामा ४७५ करोड रुपैयाँ लगानी गर्ने जनाएको छ । कम्पनीको ३५ औं वार्षिकउत्सवको अवसरमा मंगलबार जारी गरिएको प्रेस वक्तव्य मार्फत कम्पनीले यस्तो जानकारी दिएको हो । कम्पनीका अनुसार अन्तर्राष्ट्रिय मापदण्डअनुसार निर्माण गरिने यो नयाँ कारखाना दुई वर्षभित्र सम्पन्न गर्ने लक्ष्य राखिएको छ । परियोजना पूरा भएपछि करिब ५५० जनालाई प्रत्यक्ष रोजगारीको अवसर सिर्जना हुने बताइएको छ । नयाँ उद्योग सञ्चालनमा आएपछि औषधि उत्पादन क्षमतामा उल्लेखनीय वृद्धि भई औषधि आयातमा रहेको परनिर्भरता घटाउन सहयोग पुग्ने कम्पनीको विश्वास छ ।

३५ वर्षदेखि नेपाली औषधि उत्पादन क्षेत्रमा क्रियाशील देउराली–जनता फर्मास्यूटिकल्सले अत्याधुनिक प्रविधिको प्रयोगमार्फत क्याप्सुल, ट्याब्लेट, लिक्विड, ओइन्टमेन्ट, ड्राइ पाउडरलगायत २९६ प्रकारका जीवनरक्षक औषधि उत्पादन गर्दै आएको छ । कम्पनीले विश्व स्वास्थ्य संगठनको मापदण्डअनुसारको प्रमाणपत्र प्राप्त गर्दै अन्तर्राष्ट्रियस्तरको गुणस्तर सुनिश्चित गरेको जनाएको छ ।

देउराली–जनताले प्रविधि हस्तान्तरणमार्फत अन्तर्राष्ट्रियस्तरको औषधि उत्पादन प्रविधि भित्र्याउने नेपालको पहिलो औषधि उद्योगको रूपमा पहिचान बनाएको उल्लेख गर्दै नयाँ परियोजनाले स्वदेशी औषधि उद्योगलाई अन्तर्राष्ट्रिय बजारमा प्रतिस्पर्धी बनाउन थप टेवा पुग्ने विश्वास व्यक्त गरेको छ ।कम्पनीमा हाल करिब ६७५ जना दक्ष वैज्ञानिक, प्राविधिक तथा कर्मचारी कार्यरत रहेका छन् ।

नयाँ परियोजना कार्यान्वयनसँगै जनस्वास्थ्य क्षेत्रमा नवीन प्रविधि र उच्च गुणस्तरका औषधि उपलब्ध गराउने आफ्नो प्रतिबद्धतालाई अझ सुदृढ बनाउने देउराली–जनताले जनाएको छ । देउराली–जनता फर्मास्यूटिकल्सले उक्त परियोजना समयमै सम्पन्न गर्न नेपाल सरकारका सरोकारवाला निकाय, नेपाली जनता तथा सञ्चारकर्मीहरूको सहयोग, साथ र हौसलाको अपेक्षा गरेको छ ।