काठमाडौं । नेपाल चेम्बर अफ कमर्सले यसै महिना नयाँ नेतृत्व पाउँदैछ । चैत २६ र २७ गते हुने साधारणसभासँगै अध्यक्ष राजेशकाजी श्रेष्ठले वरिष्ठ उपाध्यक्ष राजेन्द्र मल्ललाई नेतृत्व हस्तान्तरण गर्दैछन् ।
साधारणसभाले ५५ सदस्य चयन गर्ने र सोही मध्यबाट अध्यक्ष र पदाधिकारी चयन हुने व्यवस्था छ । जसअनुसार अध्यक्षमा हालका वरिष्ठ उपाध्यक्ष राजेन्द्र मल्ललाई चयन गर्ने सहमति भइसकेको जनाइएको छ ।
चेम्बरको अध्यक्ष र पदाधिकारीमा सर्वसम्मतिको सम्भावना रहे पनि सदस्यमा भने निर्वाचन नै हुन भएको छ । उद्योग, वाणिज्य, द्विराष्ट्रिय र प्रदेश समूह गरी ५५ सदस्य निर्वाचित हुन चेम्बरमा ६३ जना आकांक्षी देखिएका छन् ।
यद्यपि, मनोनितसमेत गरी चेम्बरको कार्यसमिति भने ६२ सदस्यीय हुनेछ ।
यता, चेम्बरमा नयाँ अध्यक्षको टुंगो लागेसँगै वरिष्ठ उपाध्यक्ष को हुने भन्ने चर्चा सुरु भएको छ । हालका उपाध्यक्षहरु कमलेशकुमार अग्रवाल, दिपक मलहोत्रा, इच्छाराज तामाङ, प्रमोदकुमार श्रेष्ठ र भाष्करराज राजकर्णिकारमध्ये अग्रवालको सम्भावना बलियो रहेको जनाइएको छ ।
अग्रवाल लामो समयदेखि चेम्बरमा सक्रिय रहेका छन् भने वित्तीय क्षेत्रका जानकारका रुपमा उनी चिनिन्छन् ।
प्रतिक्रिया