काठमाडौं । बतास फाउण्डेसन पोखरा क्षेत्रीय अस्पतालमा अक्सिजन प्लान्ट स्थापनाका लागि जुटेको छ । बतास अर्गनाइजेसन अन्तर्गत सामाजिक कार्यका लागि स्थापित बतास फाउण्डेसनले २५ लाख बीउ पुँजी राखेर पोखरा अस्पतालमा अक्सिजन प्लान्ट स्थापनाका लागि सहयोग जुटाउन थालेको छ ।
बतास फाउण्डेसनले आवश्यक लागतको व्यवस्थापन गर्दै सकेसम्म चाँडो माध्यमबाट प्लान्ट स्थापनाका लागि विभिन्न राष्ट्रिय तथा अन्तरराष्ट्रियस्तरमा छलफल र परामर्श गरिरहेको फाउण्डेसनका अध्यक्ष आनन्दराज बतासले जानकारी दिए ।
हाल मुलुकभर कोरोना संक्रमितका लागि अक्सिजन अभाव भइरहेको छ । पोखरा अस्पतालमा पनि अभाव भएसँगै बतास फाउण्डेसनले स्वस्फूर्त प्लान्ट स्थापनाका लागि पहल थालेको हो ।
फाउण्डेसनका अध्यक्ष बतासका अनुसार प्लान्ट निर्माणका लागि ३ करोड रुपैयाँ लाग्ने छ । जसमध्ये बतासकै पहलमा अहिलेसम्म डेढ करोड रुपैयाँ संकलन भइसकेको छ।
अटोवेज प्रालीका नारायण पौडेल, सेलवेज प्रालीका शुसिल प्रधानाङ्ग, सुपर मादी हाइड्रो पावरका पुष्प ज्योती ढुंगाना, क्वालिट एग्रिगेट माइनिङका देबबहादुर ज्वारचन र बि रिभर माइनिङ प्रालीले २५–२५ लाख रुपैयाँ सहयोग गरेका छन् ।
यस्तै, भक्त बतास दमौलीबाट १ लाख तथा बतास फाउण्डेसनले पनि २५ लाख रुपैयाँ सहयोगको प्रतिबद्धता रहेको छ ।
प्रतिघण्टा १०–१५ क्युबिक मिटर अक्सिजन उत्पादन गर्न सक्ने उक्त अक्सिजन प्लान्ट ६० देखि ९० दिनमा तयार गरिसक्ने आनन्दराज बतासले जानकारी दिए।
प्रतिक्रिया