काठमाडौं । मनसुन सुरु हुनेवित्तिकै आएको बाढीले सिन्धुपाल्चोक जिल्लामा ठूलो क्षति पुर्याएको छ । सिन्धुपाल्चोकको मेलम्ची नदीमा आएको ठूलो बाढीका कारण सात जनाको मृत्यु भएको छ भने क्षतिको एकीन विवरण आइनसके पनि अर्बौं बराबरको क्षति भएको प्रारम्भिक अनुमान गरिएको छ ।
हेलम्बु र मेलम्ची क्षेत्रबाट सयौँ मानिस विस्थापित भएका छन् । पक्की घरहरु बाढीको बीचमा रहेको त्रासदीपूर्ण दृष्य देख्न सकिन्छ । मेलम्ची नदीमा मङ्गलवार साँझबाट बाढी आउन सुरु गरेपछि कतिपयले नजिकैको जंगलतिर भागेर ज्यान जोगाएका थिए ।
प्रशासनले हेलम्बु र मेलम्चीमा पानीको सतह बढेको भन्दै स्थानीयलाई सुरक्षित क्षेत्रमा जान आह्वान गरेको छ । खोज तथा उद्धारका लागि नेपाली सेना, सशस्त्र प्रहरी र नेपाल प्रहरी परिचालित गरिएको छ ।
बाढीले चारवटा पक्की पुलमा क्षति पुर्याएको छ । पीडितको बस्तीहरूमा तुरुन्तै पाल र खाद्यान्न पुर्याउने तयारी भइरहेको छ ।
यसअघि तीन दिनदेखि लगातार परेको पानीले मनाङमा केही घरहरू डुबानमा परेको स्थानीय प्रशासनले मङ्गलवार बताएको थियो।
मनाङमा लघु जलविद्युत आयोजना र केही सरकारी भवनमा पनि क्षति पुगेको बताइएको छ। टेलिफोन र विद्युत् सेवा पनि प्रभावित भएको छ।
प्रतिक्रिया