काठमाडौं । मुलुकको पर्यटन क्षेत्रको विकासका निमित्त सरकार र निजी क्षेत्रबीच पुलको भूमिका निर्वाह गर्नुपर्ने नेपाल पर्यटन बोर्ड यतिबेला आर्थिक वर्ष २०७९/८० को बजेट तर्जुमाका लागि तयारी गरिरहेको छ ।
बोर्डको बजेट निर्माणका लागि सञ्चालक समिति सदस्य मदन आचार्यको नेतृत्वमा रहेको समिति यतिबेला धुलिखेल लज रिसोर्टमा यतिबेला बजेट निर्माणमा व्यस्त छ ।
कोभिडपछि मुलुकमा पर्यटक आगमनमा देखिएको कमीका कारण पर्यटन बोर्डको प्रत्यक्ष आम्दानी घटे पनि बोर्डको बजेट निर्माणका लागि तीन दिनदेखि कार्यकारी प्रमुख धनञ्जय रेग्मी दलबलसहित धुलिखेलस्थित एक रिसोर्टमा रहेको पाइएको छ ।
मंगलबार रिसोर्ट पुगेको सीईओसहितको टिम बिहीबार यो समाचार तयार पार्दासमेत फर्केको छैन । बोर्ड सदस्यमध्ये रेग्मीका खास मान्छे भनेर चिनिएका संयोजक आचार्य र अर्का सदस्य कृष्ण शाह तीन दिनदेखि धुलिखेलमै छन् ।
बोर्डको बजेट समितिमा फाइनान्स प्रमुख पदेन सदस्यसचिव रहने व्यवस्था रहे पनि उनी भने तीनैदिन बजेट निर्माणसम्बन्धी धुलिखेल बैठकमा सहभागी भएनन् ।
सीईओ रेग्मीले आफूनिकटका केही कर्मचारीलाई पनि धुलिखेलको आवासीय बैठकमा लगेको स्रोतले जनाएको छ ।
बोर्डको बजेट तर्जुमा आफैंमा महत्वपूर्ण काम भए पनि धुलिखेलको महँगो रिसोर्टमा दलबलसहित तीन दिन बैठक राखेर तयारी गर्नुलाई पर्यटन क्षेत्रसँग सम्बन्धित व्यक्तिहरुले भड्किलोको संज्ञा दिएका छन् ।
बोर्डका एक सदस्यले भने बोर्ड अध्यक्ष खाली रहेको बेला सीइओले मनोमानी गरिरहेको र बोर्डका कार्यवाह अध्यक्ष चन्द्र रिजाललाई एक्ल्याइएको धारणा राखे ।
बोर्डमा संस्कृति पर्यटन तथा नागरिक उड्डयन मन्त्रालयका सचिव अध्यक्ष रहने व्यवस्था रहे पनि हाल मन्त्रालय सचिवविहीन छ ।
बोर्डका उपाध्यक्ष चन्द्र रिजाल यस्तो अवस्थामा स्वतः कार्यवाहक अध्यक्ष हुने भए पनि उनलाई समेत जानकारी नदिई सीईओ र दुई सदस्य धुलिखेल गएका हुन् ।
धुलिखेल बैठकका सम्बन्धमा संयोजक आचार्यसँग सम्पर्क गर्न खोज्दा सम्पर्क हुन सकेन ।
प्रतिक्रिया