नयाँ वर्ष मनाउन जहाज चार्टर गरेरै नेपाल आइपुग्यो चिनियाँ पर्यटकको टोली

बिहिबार चिनियाँ पर्यटकको एक टोली नेपाल आइपुगेको छ । नयाँ वर्षको अवसर पारेर १८१ जना चिनियाँ पर्यटक जहाज चार्टर गरी काठमाडौँ आइपुगेका हुन् ।

पछिल्लो केही वर्ष कोरोना महामारीका कारण नेपाल घुम्न आउने चिनियाँ पर्यटकको संख्या ह्वात्तै घटेको थियो । यसबीच नयाँ वर्ष मनाउन जहाज चार्टर गरेर नेपाल आइपुगेका उनीहरुलाई संस्कृति पर्यटन तथा नागरिक उड्डयनमन्त्री सुदन किराँतीले त्रिभुवन विमानस्थलमा स्वागत गरेका छन्।

चिनियाँ पर्यटकको यो आगमनले नेपाली पर्यटन क्षेत्रमा सकारात्मक सन्देश दिएको जनाउँदै मन्त्री किराँतीले नयाँ वर्षसँगै नयाँ दशकको समेत प्रारम्भ भएको बताएका छन् ।

‘नयाँ वर्षको आगमनसँगै चिनियाँ पाहुनाहरुलाई नेपाल र नेपाली जनताका तर्फबाट भव्य स्वागत गरियो’, उनले भने ,‘ भोलिदेखि नयाँ वर्ष मात्र होइन, नयाँ दशक प्रारम्भ हुँदै छ। मलाई विश्वास छ,यो दशक नेपालीहरुको लागि सुख र समृद्धिको दशक बन्नेछ।’