उद्योग र श्रम मन्त्रीसँग सीएनआईको छलफलः महसुस हुने गरी सरकारले काम गर्ने प्रतिबद्धता

नेपाल उद्योग परिसंघ (सीएनआई) ले नवनियुक्त उद्योग, वाणिज्य तथा आपूर्ती मन्त्री दामोदर भण्डारी र श्रम, रोजगार तथा सामाजिक सुरक्षा मन्त्री सरतसिंह भण्डारीसँग छुट्टाछुट्टै छलफल गरेको छ । शुक्रबार मन्त्रीद्वयलाई बधाइ तथा शुभकामना व्यक्त गर्दै सीएनआईले आर्थिक अवस्था र सुधारका विषयमा आफ्ना सुझाव दिएको हो ।

परिसंघको तर्फबाट सफल कार्यकालको शुभकामना दिँदै परिसंघका अध्यक्ष राजेश कुमार अग्रवालले निरन्तर घट्दो अर्थतन्त्रलाई माथि उकास्न औद्योगिक उत्पादन, निर्माण क्षेत्र र थोक तथा खुद्रा क्षेत्रलाई चलायमान बनाउनुपर्नेमा जोड दिए । यी क्षेत्रमा आएको निराशाका कारण समग्र अर्थतन्त्र संकुचित भएको बताउँदै उनले युवा जनशक्तिलाई पलायन हुनबाट रोक्न मुलुकमा औद्योगिकरणलाई बढावा दिइ आग्रह गरे ।

अग्रवालले शिथिल अर्थतन्त्रलाई चलायमान बनाउन निजी क्षेत्रको बनोबल बढाउनुपर्ने र लगानी गर्न सक्ने विश्वासको वातावरण बनाउन समेत मन्त्रीसमक्ष आग्रह गरे ।

सो अवसरमा उद्योग मन्त्री भण्डारीले कोभिड १९ पछि विग्रिएको अर्थतन्त्रलाई जसरी पनि उकास्नुपर्ने बताए । प्रधानमन्त्रीले महसुस हुनेगरी प्रभावकारी रुपमा काम गर्न निर्देशन दिएको जानकारी दिँदै अर्थतन्त्रको सुधार उच्च प्राथमिकतामा रहेको बताए । यो सरकारलाई काम नगर्ने छुट नभएको भन्दै मन्त्री भण्डारीले निजी क्षेत्रलाई स्पष्ट रुपमा समस्या र समाधानको उपाय दिन आग्रह गरे ।

त्यस्तै, श्रम मन्त्री सरतसिंह भण्डारीले यो सरकारप्रति आश र भरोसा रहेको बताउँदै सोही रुपमा काम हुने विश्वास व्यपक्त गरे । भण्डारीले यसअघि राखेका योजनालाई प्राथमिकताका साथ कार्यान्वयन गर्दै लैजानेमा आफू प्रतिबद्ध रहेको जनाए ।

उक्त छलफलमा परिसंघका निवर्तमान अध्यक्ष विष्णुकुमार अग्रवाल, उपाध्यक्षहरु वीरेन्द्रराज पाण्डे, भीम घिमिरे, उद्योग समिति सभापति लक्ष्मीप्रसाद सुवेदी, रोजगारदाता परिषद् सभापति धु्रब रिजाल, महानिर्देशक डा. घनश्याम ओझालगायतले मन्त्रीद्वयलाई सुझावसहित बधाई तथा शुभकामना व्यक्त गरे ।