काठमाडौं । नेपाल चेम्बर अफ कमर्सका अध्यक्ष कमलेश कुमार अग्रवालले नेपालमा अन्तराष्ट्रिय स्तरको स्थायी प्रर्दशनी केन्द्र स्थापना गर्नुपर्नेमा जोड दिएका छन् । काठमाडौंमा सम्पन्न चेम्बरको ७४औं वार्षिक साधारणसभालाई सम्बोधन गर्दै अध्यक्ष अग्रवालले स्थानीय उत्पादनको प्रवद्र्धन, बजारीकरण र निर्यात वृद्धिका लागि एकीकृत प्रर्दशनी संरचना अपरिहार्य रहेको बताएका हुन् ।
अध्यक्ष अग्रवालका अनुसार अन्तराष्ट्रिय स्तरको केन्द्रले गुणस्तर मापनदेखि निर्यात अनुकूलता सुनिश्चित गर्न मद्दत पुग्नेछ ।
उनले भने, “प्रवासी नेपालीबाट भित्रिने रेमिट्यान्सको ९० प्रतिशत उपभोगमै खर्च भइरहेको वर्तमान अवस्थालाई उत्पादनमुखी क्षेत्रमा रुपान्तरण गर्न जरुरी छ ।”
उनले मुलुकलाई आत्मनिर्भर बनाउने लक्ष्यमा उत्पादन र उत्पादकत्व वृद्धि अपरिहार्य रहेको पनि बताए । कृषि, जलश्रोत, सूचना प्रविधि र पर्यटन क्षेत्रमा लगानी आकर्षित गर्न नीति स्पष्ट पार्नुपर्नेमा उनको जोड थियो । अध्यक्ष अग्रवालले विदेशबाट फर्कने युवाको सीप व्यवस्थापन गर्दै स्वदेशमै रोजगारी सिर्जना गर्ने रणनीति आवश्यक भएको धारणा व्यक्त गरे । ऊर्जा विधेयक, अदालतको आदेश र बन मन्त्रालयका निर्देशनले जलविद्युत् क्षेत्रमा लगानी र निर्माण अन्यौलमा परेको भन्दै उनले संसदमार्फत कानुनी सुधारको माग गरे ।
धितोपत्र बोर्डले जलविद्युत कम्पनीहरूको आईपीओ रोक्नुका कारण निर्माणमा समस्या देखिएको अध्यक्ष अग्रवालको भनाइ थियो । उनले जग्गाको हदबन्दीले औद्योगिक वातावरणमा अवरोध भएको र सहकारी समस्याले साना व्यवसायीलाई मर्का पारेको उल्लेख गरे । कृषि क्षेत्रमा सहुलियत र अनुदान पारदर्शी र लक्षित समूहसम्म पुर्याउने व्यवस्थाको मागसमेत उनले गरे । सभामा व्यवसायी तथा संस्थाहरूलाई विभिन्न सम्मान प्रदान गरिएको थियो ।
प्रतिक्रिया