काठमाडौं । सरकार र शिक्षकहरूबीच आज (बुधबार) सहमति हुने भएको छ । सहमतिपछि एक महिने आन्दोलन आज टुंगिदै छ ।
आज सहमति हुनुअघि आन्दोलनरत पक्ष आन्तरिक बैठक बसेर सरकारसँग वार्तामा बस्नेछ । शिक्षकको आन्तरिक बैठक बिहान ९ बजेका लागि बोलाइएको छ ।
दिउँसो २ बजे सरकार र शिक्षकबीच वार्ता हुनेछ । उक्त बैठकमा सहमति हुने दाबी गरिएको छ ।
शिक्षकका अधिकांश माग पूरा हुने स्थिति देखिए पनि विद्यालय शिक्षा सुधारका विषय सरकार र आन्दोलनरत शिक्षकको प्राथमिकतामै परेको छैन ।
मंगलबार रातिसमम भएको वार्ता सकारात्मक भएको दुवै पक्षले बताएका छन् । सिंहदरबारमा शिक्षामन्त्री रघुजी पन्तसहित महासंघका पदाधिकारीबीच वार्ता भएको थियो ।
नेपाल शिक्षक महासंघका महासचिव तुलाबहादुर थापाले बुधबार बैठक टुंगोमा पुग्ने बताएका थिए ।
महासंघले सरकारसमक्ष नौबुँदे प्रस्ताव पेस गरेको छ । उक्त मागमा छलफल भइसकेको छ ।
महासचिव थापाका अनुसार, हस्ताक्षरपछि आन्दोलनको स्परुप परिवर्तन हुनेछ । आन्दोलनको स्वरुप कस्तो हुने शिक्षकको आन्तरिक बैठकले निर्धारण गर्नेछ ।
महासंघले विद्यालय कर्मचारी र ईसीडीका शिक्षकको तलबको सुनिश्चितता, सामाजिक सुरक्षा कोषमा आबद्ध गराउने, दुर्गम भत्ता व्यवस्था गर्ने, शिक्षकहरूको ग्रेड समायोजन गर्ने, मर्यादा क्रममा शिक्षकहरूलाई समेट्ने, शिक्षकको उपचारमा छुटको व्यवस्था गर्ने, निमावि प्रथम र मावि द्वितीयको तलबमा एकरूपता ल्याउने विषय शिक्षक महासंघले वार्तामा उठाएको छ ।
शिक्षकहरूले विभिन्न माग राखी गत चैत २० गतेदेखि आन्दोलन गरिरहेका छन् ।
प्रतिक्रिया