काठमाडौं । नेपाली कांग्रेसका सभापति शेरबहादुर देउवाले राष्ट्र बैंकको गभर्नर नियुक्तिमा भइरहेको ढिलाइमा प्रधानमन्त्री केपी शर्मा ओलीको कुनै दोष नरहेको बताए ।
विद्यमान आर्थिक परिवेशमा बजेटले समेटनुपर्ने नीति विषयक संवाद गोष्ठीमा बोल्दै मंगलार उनले राष्ट्र बैङ्कको आन्तरिक समस्याका कारण गभर्नर नियुक्तिमा ढिलाइ भएको बताएका हुन् ।
उनले भने, ‘अहिले एमाले पार्टीका नेता केपी ओलीसँग गठबन्धन छ । गठबन्धनमा कुनै समस्या छैन । अहिले राष्ट्र बैंकको गर्भनरको विषयमा हामीबीच कुनै समस्या छैन । गभर्नर नियुक्ति ढिलो हुनुमा राष्ट्र बैङ्क भित्रकै समस्याले हो । ओलीको कारणले होइन ।’
देउवाले इंगित गर्न खोजेको कामु गभर्नर निलम ढुंगानाले कार्यकारी निर्देशक गुणाकर भट्टको राजीनामा स्वीकृत नगरेकै कारण नियुक्तिमा ढिलाई भएको हो ।
गभर्नरका लागि आफैँ स्वाभाविक दावेदार समेत रहेकी ढुंगानाले ठूलो राजनीतिक आडबिना यति अडान लिन सक्छिन् भन्ने विश्वास कसैलाई छैन ।
ढुंगानाले हलो अड्काइन्, कसको बलमा ? जवाफ प्रष्ट छ: उनलाई गभर्नर बनाउन चाहने शक्तिको आडमा।
त्यो शक्ति को हो भन्ने छिपेको छैन; मुलुकका कार्यकारी प्रमुख केपी ओलीकै डिजाइनमा यो भैरहेको भन्ने शासकीय व्यवस्था बुझ्ने जो कोहीलाई थाहा छ ।
देउवालाई थाहा नहुने कुरै भएन । तर उनले किन ओलीको दोष छैन भने ?
देउवालाई गठबन्धन बचाउनु छ र आफू प्रधानमन्त्री एमालेकै बलमा बन्नु छ ।
ओलीलाई काँध थाप्दा भारत लगायतका पुराना मित्रशक्तिको प्रेसरलाई समेत थेगेका देउवा अझै ओलीलाई बोक्न चाहान्छन् भन्ने उनको स्पष्ट संकेत पनि हो ।
यसबाहेक देउवा गठबन्धन टुटे पनि आफ्नो कारण टुटेको सन्देश प्रवाह नहोस् भन्नेमा सचेत देखिन्छन् ।
अघिल्लो पटक प्रचण्डले एकतर्फी गठबन्धन तोड्दा देउवाप्रति समर्थन र सद्भाव बढेको थियो भने ओलीले गठबन्धन तोडिहाले पनि लाभ देउवालाई नै पुग्नेछ ।
प्रतिक्रिया